Чеченистон раҳбари Рамзан Қодировнинг 13 ёшли ўғли Адам Қодиров Грознийда бўлиб ўтган бокс мусобақасида ҳакам кутилмаганда жангни тўхтатиб, ҳали йиқилмаган рақибнинг нокдаунини ҳисоблашни бошлагач, ғалаба қозонди. Бу ҳақда Meduza хабар берди.
Учрашувда намойиш этилган жанг видеоси «Матч! Боец» телеканалида кўрсатилиб, «Не ТВ»да жамоатчиликка тақдим этилган. Жангдаги ноодатий ҳолатга «Подём» нашри эътибор қаратди.
Жанг апрель ойи бошида Грозний шаҳридаги «Афсоналар вақти 6: Махсус операция» бокс турнирида бўлиб ўтган. Рингда Адам Қодиров қора кийимда бўлса, унинг рақиби — Россия Федерацияси таркибига кирувчи Кабардин-Балкария Республикасидан келган Аслан Биттиров кўк рангли кийимда эди. Биттиров ва Қодировнинг ўғли эндигина бир-бирига зарба беришни бошлаганда ҳакам жангни тўхтатган ва Биттировнинг нокдаунини ҳисоблашни бошлаган. Биттировнинг секунданти эса мағлубиятини тан олиб, рингга сочиқни ташлаган. Шундан сўнг жанг тугади деб эълон қилинган. «Ростини айтсам, жуда тушунарсиз ҳолат», — деди жанг шарҳловчиси эфирда.
8 апрель куни «Грозний-информ» веб-сайтида ҳаваскорлар жангларнинг бирида Адам Қодиров техник нокаут билан ғалаба қозонгани ҳақида хабар тарқалди. «Боксчининг рақиби Кабардин-Балкариядан Аслан Биттиров эди, томошабинларнинг сўзларга кўра, Адам унга биттаям имконият қолдирмаган», — деб ёзади нашр.
2020 йилнинг декабрь ойида Рамзан Қодировнинг 20 ёшли қизи Хадижат Қодирова Грознийда мактабгача таълим бошқармаси бошлиғи бўлган эди. 2020 йилнинг сентябрида Қодиров ўзининг 21 ёшли қизи Айшатни республика маданият вазирининг биринчи ўринбосари этиб тайинлаганди.
Изоҳ (0)