Олий Мажлиснинг Инсон ҳуқуқлари бўйича вакили (омбудсман) ўринбосари – Бола ҳуқуқлари бўйича вакили Алия Юнусова 12—15 апрель кунлари Сурхондарё ва Қашқадарё вилоятларида хизмат сафарида бўлиб қайтди.
Хизмат сафари давомида Бола ҳуқуқлари бўйича вакил Болалар уйи ва Меҳрибонлик уйларида етим болалар ва ота-онасининг қарамоғидан маҳрум бўлган болалар учун яратилган шароитлар, тарбияланувчиларнинг тиббий кўрикдан ўтиши, соғломлаштириш, соғлом овқатлантириш ҳолатлари, болаларни оилаларга қайтариш жараёни, муассаса битирувчиларининг бандлиги, жамиятга ижтимоий мослашувини таъминлаш, болаларни ижтимоий қўллаб-қувватлаш бўйича амалга оширилган ишлар ҳолати, муаммо ва таклифларни ўрганган.
Ўрганишлар Қашқадарё вилояти Китоб туманида жойлашган 5-Меҳрибонлик уйида давом эттирилган. Ўрганиш куни муассасада 65 нафар (қизлар 28 нафар) тарбияланувчилар бўлиб, уларнинг 15 нафарини чин етимлар ташкил этади.
Тиббиёт хонаси, стомотолог хонаси, беморларнинг алоҳидалаш хоналарининг таги бетон қопламали бўлиб, заҳкаш. Болаларнинг бўш вақтини ўтказиш учун етарли шароитлар мавжуд эмас. Мебеллар эски.
Соғлом овқатлантириш ҳолатларини ўрганиш давомида Бола ҳуқуқлари бўйича вакил эътиборини тарбияланувчиларнинг биринчи овқатни умуман емасдан чиққани ва деярли иккинчи овқатни ҳам емагани диққатини тортган. Биринчи овқатга карам шўрваси қилинган бўлиб, у ўта ёғли ва ўзига хос ҳиди бўлган.
Болаларга тушликда шарбатлар берилмаган. Ҳолат юзасидан маҳсулотлар сифатини кўриш учун озиқ-овқат омборига ташриф буюрилганида маҳсулотлар сифати бузилгани, карам, редиска, картошка ва нокларнинг чириб қолгани, гўшт рангининг ўзгаргани, кўплаб ёғлари борлиги аниқланган. Шунингдек, гўшт маҳсулотларини тортиб кўриш сўралганда тарози йўқлиги, ошхонанинг санитария ҳолати яхши эмаслиги, идишлар етишмаслиги, болаларга алюминий кружкаларда чой берилаётгани, кружкаларнинг ушлашга эса қулоқлари йўқлиги, бу болалар соғлиги учун хавф туғдириши ва яна бир қатор камчиликлар мавжудлиги маълум бўлган.
Ҳолатни чуқур ўрганиш учун туман прокуратурасидан вакил чақирилган ва мавжуд камчиликларни бартараф қилиш юзасидан мутасаддиларга мажбурий кўрсатмалар берилган.
Изоҳ (0)