Google Earth’га Ер сайёраси 37 йил ичида қанчалик ўзгарганини намойиш этиш учун 3D таймлапслар қўшилди (видео)

Google компанияси Ер сайёраси сўнгги 37 йил ичида қанчалик ўзгарганини намойиш этиш учун 2017 йилдан бери биринчи бор Google Earth’даги Timelapse сервисини янгилади. Бу ҳақда компания блоги орқали маълум қилинди.

Мазкур таймлапсни яратиш учун 1984 йилдан 2020 йилга қадар сунъий йўлдошлардан олинган 24 миллиондан ортиқ суратлар бирлаштирилган. Улар минглаб компьютерларда икки миллион соатдан ортиқ вақт давомида қайта ишланган.

«Видеомозаика» ўзида 20 петабайт маълумотни жамлаган ва 4,4 терапикселни ташкил этади — бу 4К сифатдаги 530 минг видеога тенг демак.

Google ўзининг мазкур янгилигини «сайёрадаги энг катта видео» деб атаган.

Компания томонидан тақдим этилган учта роликда сўнгги ўн йилликларда дунё бўйлаб ўрмонларнинг йўқолиб кетиши, музликларнинг эриши ва қурилган шаҳарлар тасвирланган.