«Ўзгидромет» маълумотларига кўра, 19 апрель куни мамлакат бўйлаб кам булутли об-ҳаво бўлади, ёғингарчилик кутилмайди. Фақат Қорақалпоғистоннинг шимолий туманларида баъзи жойларда бироз ёмғир ёғиши, момақалдироқ бўлиши мумкин, баъзи жойларда шамол 15-20 метр/секундгача кучаяди. Куннинг ўртасига келиб, ҳаво 24-27 даража илиқгача исийди.
20—21 апрель кунлари Ўзбекистон ҳудудига Каспий денгизи ҳудудларидан нам ҳаво массалари, сўнг Урал ҳудудларидан деярли совуқ антициклон кириб келади.
20 апрелда кундуз куни Тошкент, Самарқанд, Жиззах, Сирдарё вилоятларида ёмғир ёғади, момақалдироқ бўлиши мумкин. Бухоро, Навоий, Қашқадарё, Сурхондарё вилоятларида фақат баъзи жойларда бироз ёмғир ёғиши мумкин. Ҳаво ҳарорати кечаси 12-17 даража илиқ, кундузи 17-22 даража илиқ атрофида бўлади.
21 апрелда республиканинг марказий ва шарқий ҳудудларида ёмғир ёғади, баъзи жойларда момақалдироқ билан кузатилади. Кундузги ҳаво ҳарорати 13-18 даража илиқгача пасаяди.
Республиканинг айрим туманларида 20—21 апрель кунлари шамол 17-22 метр/секундгача кучайиши мумкин. Республиканинг тоғолди ва тоғли ҳудудларида шу кунларда ёмғир ёғади, баъзи жойларда кучли бўлади, сел келиши хавфи бор.
Иш ҳафтасининг иккинчи ярмида Ўзбекистоннинг барча ҳудудлари бўйича кам булутли ва қуруқ об-ҳаво бўлади.
22 апрелда совуқ антициклон перифериясида ҳарорат кечалари 3-8 даража илиқгача пасаяди, кундуз кунги ҳарорат эса аста-секин кўтарила бошлайди ва кундузи ҳаво 17-20 даража илиқгача исийди, 23 апрелда эса 22-25 даража илиқгача кўтарилади.
Тошкент ва Наманган вилоятларининг тоғли ҳудудларида 2200 метрдан юқорида қор кўчиши хавфи бор.
Эслатиб ўтамиз, «Ўзгидромет» 20 апрелда Ўзбекистон ҳудудига шимоли-ғарбий оқим билан Россия ҳудудларидан совуқ ва нам ҳаво массалари кириб келиши бошланишини, 20—21 апрелда кўпгина вилоятларда ёмғир ёғиб, шамол тезлиги кучайиши кутилаётганини маълум қилганди.
Изоҳ (0)