Илон Маскнинг SpaceX компанияси 2024 йилда астронавтларни Ойга юбориш шартномасини қўлга киритди. Бу ҳақда «Интерфакс» хабар берди.
«NASA астронавтларни Ойга етказиш учун SpaceX’ни танлади. SpaceX билан ҳамкорлик қилаётганимиздан мамнунмиз», — деди одамларни Ойга етказиш бўйича NASA дастурининг раҳбари Лиза Уотсон-Морган.
Шунингдек, шартнома учун ўтказилган танловда Dynetics, Blue Origin (Lockheed Martin билан ҳамкорликда), Northrop Grumann ва Draper компаниялари иштирок этди.
Хабарда таъкидланишича, астронавтларнинг хавфсизлигини таъминлаш учун келажакда кўп марталик Starship кемасининг синовлари ўтказилади.
Аввалроқ SpaceX компанияси 19 апрель куни SN15 прототипи двигателларининг статик ёнғин синовлари ўтказилиши ҳақида хабар берган эди. Кема Техас штатининг жануби-шарқидаги Бока-Чика ҳудудида жойлашган полигон майдонига ўрнатилган. Синов доирасида кема 10 километр баландликка кўтарилиши, сўнгра двигателларни ўчириб, аэродинамик тормозлаш, вертикал ҳолатга қайтиш учун двигателларни қайта ишга тушириш ва учириш майдончасига муваффақиятли қўниши керак.
Кеманинг аввалги тўртта суборбитал синовлари муваффақиятсизликка учраган эди. Улар двигателдаги техник муаммолар сабабли портлаб кетган эди.
2020 йилнинг сентябрь ойида NASA «Артемида» (Artemis) режасини эълон қилди. Унга кўра, космик бўлимга 2024 йилда одамларни Ойга хавфсиз юбориш вазифаси юклатилади.
Аввалроқ Perseverance марсоходи биринчи марта Марс юзасида «сайр қилгани» ҳақида хабар берилди. Шунингдек, АҚШ Аэронавтика ва фазовий бўшлиқларни тадқиқ қилиш миллий агентлиги (NASA) Perseverance роверини Марсга қўндириш вақтида олинган видеоёзувни эълон қилди.
Изоҳ (0)