Marsga uchishga mo‘ljallangan Starship raketasi prototipi sinovlar chog‘ida yana portladi (video)

Ilon Maskning SpaceX kompaniyasiga tegishli Starship kosmik kemasi prototipi sinov parvozi chog‘ida qo‘nish paytida yana portlab ketdi. Bu haqda Deutsche Welle xabar bermoqda.

O‘n birinchi seriyali Starship SN11 sinov qurilmasi kompaniyaning Texas shtatidagi Boka-Chika aholi punktidagi poligonidan uchirildi. To‘g‘ridan to‘g‘ri translyatsiya SpaceX’ning Twitter’dagi sahifasi orqali olib borildi.

Live feed of Starship SN11 flight test → https://t.co/Hs5C53qBxb https://t.co/Dl0iss2aPZ

— SpaceX (@SpaceX) March 30, 2021

Kema 10 kilometr balandlikka chiqib, dvigatelning o‘chirilishi, aerodinamik tormozlanish va vertikal holatga qaytish uchun dvigatellarni qaytadan ishga tushirishni muvaffaqiyatli mashq qildi. So‘ng Yerga tushib, qo‘nishdan bir daqiqa avval portlab ketdi. SpaceX hozircha hodisa sababini ma’lum qilgani yo‘q.

NSF: pic.twitter.com/Kl7sqiaS5p

— Chris Bergin - NSF (@NASASpaceflight) March 30, 2021

Bu raketalarning suborbital balandlikka parvoz qilish bilan bog‘liq to‘rtinchi muvaffaqiyatsiz sinovidir.

Starship’ning sakkizinchi va to‘qqizinchi prototiplari 2020-yil dekabrida va 2021-yil fevralida sinov parvozlari chog‘ida qo‘nish paytida portlab ketgan edi.

Starship SN10 (o‘ninchi seriyali sinov qurilmasi) esa 4-mart kuni uchirildi. O‘shanda SpaceX parvoz sinovlari paytida birinchi marta Starship prototipini qo‘ndirishga muvaffaq bo‘ldi. Lekin u qo‘nganidan keyin 7 daqiqa o‘tib portlab ketdi.

Starship kosmik kemasi va o‘ta og‘ir raketasi Yerga yaqin orbita, Oy va Marsga ekipaj va yuklarni olib chiqishga mo‘ljallangan. Starship Yerga yaqin orbitaga 100 tonnadan ortiq yukni yetkazishga qodir bo‘lgan tarixdagi eng kuchli tashuvchi raketa bo‘lishi kutilmoqda.