Geely kompaniyasi tezlik, ob-havo va tirbandliklar haqida ma’lumot beruvchi golografik tasvirni yaratishga xizmat qiladigan Aerial Intelligent Displey (“Aqlli havo displeyi”) tizimini taqdim etdi. Bundan tashqari, AID qo‘shiq aytib, raqsga tusha oladigan uch o‘lchamli yordamchi-avatarga ham ega, deb xabar beradi Motor.
Prism Entertainment bilan hamkorlikda yaratilgan Geely’ning yangi tizimi turli rakurslardan va yoritilgan muhitda ham ko‘rish mumkin bo‘lgan uch o‘lchamli rangli tasvirlarni hosil qiladi. Proyeksion displeylardan farqli o‘laroq, AID biror yuzaga muhtoj emas va 3D tasvirni to‘g‘ri havoga “chizadi”. Odatdagi displeylar mashinaning old oynasidan foydalanadi, biroq ular ikki o‘lchamli tasvirdir.
Ma’lumotlarga ko‘ra, AID’ning golografik tasvirini har bir dyuymli 352 pikseldan iborat bo‘lib, uning “donalarini” 20 santimetr yaqinlikdan payqash mumkin, xolos. Tasvir yorqinligi 10 ming nit bo‘lib, bu zamonaviy ekranlardan 4-10 barobarga ko‘p demak.
Tashqi ko‘rinishini sozlash mumkin bo‘lgan golografik assistent haydovchi bilan yangi darajada “muloqot” qila oladi: ob-havo, harakat tezligi, harakatlanish rejimi va navigator ma’lumotlarini ko‘rsatadi, shuningdek, xavf-xatardan ogohlantiradi. Shuningdek, u chatlardagi xabarlarni o‘qishi, raqsga tushib, qo‘shiq aytishi mumkin.
Bu kabi innovatsion displey birinchi bo‘lib Geely’ning Icon krossoveriga o‘rnatiladi. Xitoy kompaniyasi kelajakda ushbu texnologiyani boshqa modellarga ham joriy etishni rejalashtirgan.
Eslatib o‘tamiz, 2020-yilda Geely kompaniyasi Volvo bilan hamkorlikda Icon krossoverini ishlab chiqarishni yo‘lga qo‘ygan edi. Ushbu model IAPS maxsus iqlim qurilmasi bilan jihozlangan bo‘lib, u salon ichidagi insonni bakteriya va viruslardan himoya qilishga qodir.
Izoh (0)