Ижтимоий тармоқларда фарғоналик аёлнинг Миллий гвардия ходими дубинка билан урганлиги ҳақидаги видеолавҳаси тарқалганди. Мазкур видеохабар Фарғона вилоят ИИБ томонидан ўрганиб чиқилиб, воқеа 2020 йил июнь ойида Тошлоқ туманида юз бергани аниқланганди. ЎзА ушбу аёл иши судда кўриб чиқилиб, айбдорларга тегишли жазо тайинланганини маълум қилди.
Журналистик суриштирувда аёлни калтаклаган эркакларнинг бири шаръий никоҳдаги эри бўлиб, ички ишлар вазирлигида ишлаши, иккинчи эркак эрининг акаси, Миллий гвардия ходими эканлиги аниқланган. Аёл бир неча йил аввал Жиноят кодексининг 168-моддаси (фирибгарлик) билан судланган. Йигит бу аёл билан яширинча яшаб юрган, 2020 йил бошқа аёл билан расмий никоҳдан ўтган.
Бундан хабар топган шаръий никоҳдаги аёл жанжал кўтариб, шаръий эрига тўйдан бир кун аввал шарт қўйган. Шартида ўзаро туғилган фарзандига оталикни белгилашни ва фамилиясини беришни, акс ҳолда йигитнинг тўйини бузишини ва шарманда қилишини айтган. Иложсиз йигит тўйдан бир кун олдин фарзандига фамилия бериш билан шуғулланган. Тўй ўтгач аёл йигитнинг уйига бориб, уй олиб беришини талаб қилиб яна жанжал кўтарган.
Орадан бироз вақт ўтгач, йигит ва унинг оиласи машинада кетаётганда уларни пойлаб юрган аёл машина йўлини тўсган ва ўртада яна жанжал бошланган. Машинада ўтирган янги келин ҳам тушиб, ўз қонуний эрини ҳимоя қилиш учун ўртага аралашган. Аёл шу вақт келинга ташланиб, сочини юлиб ерга йиқитиб урган. Йигит уларни ажратишга ҳаракат қилади, аммо аёл келиннинг сочини қўйиб юбормагач, куч ишлатган. Миллий гвардияда ишлайдиган йигитнинг акаси ҳам жим қараб туролмай аралашган. Шундай қилиб, аёлга икки эркак томонидан тан жароҳати етказилган.
ЎзАнинг маълум қилишича, 14 апрель куни Жиноят ишлари бўйича Тошлоқ туман судида Д.У (видеодаги жароҳатланган аёл) ва (йигитнинг қонуний хотини) Н.М.га нисбатан Маъмурий жавобгарлик тўғрисидаги кодекснинг 41-моддаси (ҳақорат қилиш) ва 52-моддасининг 2-қисми (қасддан баданга енгил тан жароҳати етказиш) билан юритилган маъмурий иш ҳужжатлари кўриб чиқилди.
Д.У. 2020 йил 22 июнь куни соат 20:00 ларда Тошлоқ тумани «Қанжирға» маҳалла фуқаролар йиғинида Д.М.нинг қонуний турмуш ўртоғи бўлган аёл Н.М. билан ўзаро гап талашиб қолган. Улар бир-бирларини уятли сўзлар билан сўкиб ҳақорат қилган, жанжаллашиб бир-бирининг танасига тан жароҳати етказган. Икки аёл ўзаро ёқалашиб турганида йигитнинг акаси Миллий гвардия ҳарбий хизматчиси А.М. келин билан ёқалашаётган аёл Д.У.ни ажратиб олиш пайтида унга енгил тан жароҳати етказади.
Судга оид тиббий экспертизанинг хулосасида келин Н.М.нинг ўнг елкасини олдинги юзасини юқориги қисмидаги қонталаш, чап тирсак бўғимини устки юзасидаги, чап ва ўнг тизза бўғимларини устки юзаларидаги шилинмалар аниқланиб, бу тан жароҳатлари 6 кундан кўп давом этмайдиган енгил шикастлар тоифасига кириши кўрсатилган.
Видеодаги аёл Д.У.да ҳам енгил шикастлар бўлган ҳамда экспертиза хулосасида кўрсатилган. Қўшимча суд тиббий экспертизасининг 2021 йил 1 мартдаги хулосасида Д.У.нинг юз соҳасида озгина сезиладиган чандиқ мавжуд бўлиб, чап кўз остидаги юзаки жароҳатнинг битганидан қолганлиги ва бу жароҳат битиб кетадиган жароҳатлар туркумига кириши, шунингдек, ушбу чандиқ юз ассиметриясига ва функционал ўзгаришларга сабаб бўлмаганлиги қайд этилган.
Миллий гвардия «Динамо» жисмоний тарбия-спорт жамиятининг 2020 йил 5 октябрдаги буйруғи билан ҳарбий хизматчи А.М. Д.У.ни ҳақорат қилиб, унга қасддан енгил тан жароҳати етказгани сабабли унга нисбатан Маъмурий жавобгарлик тўғрисидаги кодекснинг 16-моддаси тартибида ҳайфсан интизомий жазо чораси қўлланилган.
Суд Д.У.нинг суддаги, Н.М., Д.М. ва А.М.нинг эса суриштирувдаги кўрсатмаларини эшитиб, якуний хулосага келган. Қарор билан аёлларнинг ҳар бирига нисбатан юқоридаги моддалар билан базавий ҳисоблаш миқдорининг бир баравари (18 апрель ҳолатига кўра, 245 минг сўм)дан жарима жазолари тайинланган.
Изоҳ (0)