Бухоро вилояти Бухоро туманидаги мактабларнинг бирида ўлим ҳолати қайд этилди. Марҳумнинг отаси қотил аниқлигини, аммо унга чора кўрилмаётганини айтмоқда. Бу ҳақда суриштирув олиб борган «Дарё» мухбирининг маълум қилишича, воқеа 2021 йил 26 март куни тумандаги 28-мактабнинг спорт залида содир бўлган.
Вилоят прокуратураси ахборот хизматининг «Дарё»га маълум қилишича, ушбу ҳолат бўйича Бухоро туман прокуратураси томонидан олиб борилган терговга қадар текширув давомида ҳодиса жойи ва марҳумнинг жасади кўздан кечирилиб, алоқадор шахслардан тушунтириш хатлари олинган ҳамда ўлим сабаби ва у билан боғлиқ бошқа ҳолатларни аниқлаш учун судга оид тиббиёт экспертизаси тайинланган. Шунингдек, 8 апрель куни Жиноят кодексининг 102-моддаси 1-қисми (эҳтиётсизлик орқасидан одам ўлдириш) билан жиноят иши қўзғатилган.
«Ўғлимнинг жасадини уйга олиб келсам, томоғининг таги товуқнинг тухумидек шишиб, кўкариб кетган экан. Уриб ўлдирилгани кўриниб турганди. Аммо орадан шунча вақт ўтса ҳамки, ҳеч ким хабар олмаяпти, ҳеч қандай хулоса ҳам айтилмади. Ўғлимнинг қотили аниқ, аммо ҳамма жим турибди. 15 май куни ўғлимнинг тўйи бўлиши керак эди. Ўлимидан уч-тўрт кун олдин фотиҳа тўйини ўтказган эдик», — дейди марҳумнинг отаси Мустафо Худойбердиев.
Билдирилишича, 26 март куни кечки пайт тумандаги «Гулшанобод» маҳалла фуқаролар йиғини Лоша қишлоғида яшовчи 20-25 нафар йигит ҳудудда жойлашган мактабнинг спорт залида волейбол ўйнаган. 1995 йилда туғилган Муроджон Ибрагимов ўйинга ҳакамлик қилган. Соат тахминан 22:00 да Муроджон ҳамда шу қишлоқда яшовчи 22 ёшли С.Х. ўртасида келишмовчилик келиб чиққан.
«Соат, тахминан, кечки 10 дан ошганди. Биз ўйнаётганда улар четда эди. Муроджон стулчада ўтириб, ҳакамлик қилаётганди. Кутилмаганда улар жанжаллашиб қолди. Одамлар ажратишга улгурмаёқ, улар ёқалашиб кетди. С. Муроджоннинг юз қисмига икки марта урди. Муроджон полга йиқилди, кейин ўрнидан турди, бир-икки қадамча босишга уринди. Йўқ, яна полга узала йиқилди ва қайтиб турмади. Мен тергов жараёнида ҳам қандай кўрган бўлсам, шуни билдирдим. Яширадиган ҳолатмас бу», — деди воқеа гувоҳи, Муроджоннинг ҳамқишлоғи Бекзод Арзиев.
Мустафо Худойбердиевнинг айтишича, ўғли Муроджон Ибрагимов 26 март куни кечки пайт соат 20:00 да сартарошхонага бориш учун уйдан чиқиб кетган. Сўнг маҳаллада жойлашган 28-мактабнинг спорт залига борган ва волейбол ўйнаётган қишлоқ болаларига ҳакамлик қилган. Ўйин давомида ён қўшниси билан оғзаки тортишган.
«Қишлоқ болаларининг айтишларича, С. кутилмаган пайтда ўғлимнинг чап тарафидан келиб урган. Ўғлимнинг қотили аниқ. У ўғлимни урганини барча орган ходимлари ҳам эшитиб, билиб турибди. Аммо ишни ёпишга ҳаракат қилишяпти. С. бундан олдин ҳам уч-тўрт кишини уриб, ҳушидан кеткизганди, аммо ҳеч қандай чора кўрилгани йўқ. С.Х. ўғлимни қасддан уриб, ўлдирган. Ўғлимнинг қотилига жазо борми? У менинг якка-ю ёлғиз ўғлим эди. Менинг энди бу дунёда яшашдан нима мақсадим қолди?!» — дейди ота.
Марҳумнинг амакиси Абдулла Худойбердиевнинг айтишича, спорт залдаги ҳолатдан ўша ерда бўлган ҳамқишлоқ болаларнинг барчаси хабардор бўлган.
«Мен ҳам волейбол ўйнаб ўтирган эдим. С. жиянимни уриб, кейин қочиб кетганини ўз кўзим билан кўрдим. Жияним полга йиқилди. С. кўчага чиқиб қочди. Бир бола: ‘Тўйи бўларди. Нега урдинг?’, деганда, ‘У мени сўкди, шунинг учун урдим’, деди’», — дейди Абдулла Худойбердиев.
28-мактаб директори Мадинабону Сафарованинг «Дарё»га билдиришича, мактабнинг спорт зали кечки пайт маҳалла болалари учун очиб берилган ва бунга 2021 йилнинг 23 март кунидан бошлаб рухсат берилган. Воқеа содир бўлган куни директорнинг хўжалик ишлари бўйича ўринбосари ҳамда мактаб қоровули ҳам ўша ерда бўлган ва ҳолатни кўрган.
«Мен спорт залига кирганимдан ярим соат ўтиб, тўполон бўлди. С. Муроджоннинг юзига урди. Бир пайт қарасам, Муроджон чап томони билан полда ётибди. Касалхонага олиб боргунча, оғзи ва бурнидан қон кетди, афсуски, йўлдаёқ жони узилди», — дейди қишлоқ фуқароси Камол Абдиев.
Билдирилишича, қишлоқ болалари Муроджон Ибрагимовни зудлик билан касалхонага олиб борган. Бироқ у Бухоро шаҳридаги Республика шошилинч тиббий ёрдам илмий маркази вилоят филиалига боргунга қадар вафот этган.
Филиал бош шифокори ўринбосари Қаҳрамон Каримовнинг «Дарё»га маълум қилишича, бемор қабул қилинган ва зудлик билан тиббий-назорат текшируви ўтказилган ва фуқаронинг вафот этгани тўла тасдиқланган. Ички ишлар органлари вакиллари иштирокида ҳужжатлар расмийлаштирилиб, экспертизага жўнатилган.
«Дарё» мухбири ҳолат юзасидан туман прокуратурасига мурожаат қилиб, ахборот олишга уринди. Мухбир билан боғланган вилоят прокуратураси ахборот хизмати раҳбари фуқаронинг ўлими юзасидан ҳали экспертиза хулосаси олинмаганини айтиб, хулосани олиш бир ойга қадар давом этиши мумкинлигини билдирди. Бухоро туман прокуратураси терговчиси Шаҳобиддин Исмоилов «Дарё» мухбири билан суҳбатда ҳолат юзасидан терговга қадар суриштирув ишлари давом этаётганини маълум қилди.
Марҳумнинг отаси Мустафо Худойбердиев ўғлининг ўлимида қўшниси С.Х.ни айбларкан, унинг қассоблигига, қорамолларни сўйишга тайёрлашдан олдин уларнинг бўйнидан уриб қандай йиқитса, бунда ҳам худди шундай усулни қўллаганига эътибор қаратмоқда. «Қўшнимиз қассоб бола. Бераҳм. Олдин чиқарган ишкалларидан ҳам участка нозирлари хабардор бўлган», — дея такрорлади ота.
Бухоро вилоят прокуратурасидан маълум қилишларича, ушбу иш бўйича тергов вилоят прокуратураси томонидан назоратга олинган.
«Дарё» воқеалар ривожини кузатишда давом этади.
Изоҳ (0)