Ijtimoiy tarmoqlarda farg‘onalik ayolning Milliy gvardiya xodimi dubinka bilan urganligi haqidagi videolavhasi tarqalgandi. Mazkur videoxabar Farg‘ona viloyat IIB tomonidan o‘rganib chiqilib, voqea 2020-yil iyun oyida Toshloq tumanida yuz bergani aniqlangandi. O‘zA ushbu ayol ishi sudda ko‘rib chiqilib, aybdorlarga tegishli jazo tayinlanganini ma’lum qildi.
Jurnalistik surishtiruvda ayolni kaltaklagan erkaklarning biri shar’iy nikohdagi eri bo‘lib, ichki ishlar vazirligida ishlashi, ikkinchi erkak erining akasi, Milliy gvardiya xodimi ekanligi aniqlangan. Ayol bir necha yil avval Jinoyat kodeksining 168-moddasi (firibgarlik) bilan sudlangan. Yigit bu ayol bilan yashirincha yashab yurgan, 2020-yil boshqa ayol bilan rasmiy nikohdan o‘tgan.
Bundan xabar topgan shar’iy nikohdagi ayol janjal ko‘tarib, shar’iy eriga to‘ydan bir kun avval shart qo‘ygan. Shartida o‘zaro tug‘ilgan farzandiga otalikni belgilashni va familiyasini berishni, aks holda yigitning to‘yini buzishini va sharmanda qilishini aytgan. Ilojsiz yigit to‘ydan bir kun oldin farzandiga familiya berish bilan shug‘ullangan. To‘y o‘tgach ayol yigitning uyiga borib, uy olib berishini talab qilib yana janjal ko‘targan.
Oradan biroz vaqt o‘tgach, yigit va uning oilasi mashinada ketayotganda ularni poylab yurgan ayol mashina yo‘lini to‘sgan va o‘rtada yana janjal boshlangan. Mashinada o‘tirgan yangi kelin ham tushib, o‘z qonuniy erini himoya qilish uchun o‘rtaga aralashgan. Ayol shu vaqt kelinga tashlanib, sochini yulib yerga yiqitib urgan. Yigit ularni ajratishga harakat qiladi, ammo ayol kelinning sochini qo‘yib yubormagach, kuch ishlatgan. Milliy gvardiyada ishlaydigan yigitning akasi ham jim qarab turolmay aralashgan. Shunday qilib, ayolga ikki erkak tomonidan tan jarohati yetkazilgan.
O‘zAning ma’lum qilishicha, 14-aprel kuni Jinoyat ishlari bo‘yicha Toshloq tuman sudida D.U (videodagi jarohatlangan ayol) va (yigitning qonuniy xotini) N.M.ga nisbatan Ma’muriy javobgarlik to‘g‘risidagi kodeksning 41-moddasi (haqorat qilish) va 52-moddasining 2-qismi (qasddan badanga yengil tan jarohati yetkazish) bilan yuritilgan ma’muriy ish hujjatlari ko‘rib chiqildi.
D.U. 2020-yil 22-iyun kuni soat 20:00 larda Toshloq tumani “Qanjirg‘a” mahalla fuqarolar yig‘inida D.M.ning qonuniy turmush o‘rtog‘i bo‘lgan ayol N.M. bilan o‘zaro gap talashib qolgan. Ular bir-birlarini uyatli so‘zlar bilan so‘kib haqorat qilgan, janjallashib bir-birining tanasiga tan jarohati yetkazgan. Ikki ayol o‘zaro yoqalashib turganida yigitning akasi Milliy gvardiya harbiy xizmatchisi A.M. kelin bilan yoqalashayotgan ayol D.U.ni ajratib olish paytida unga yengil tan jarohati yetkazadi.
Sudga oid tibbiy ekspertizaning xulosasida kelin N.M.ning o‘ng yelkasini oldingi yuzasini yuqorigi qismidagi qontalash, chap tirsak bo‘g‘imini ustki yuzasidagi, chap va o‘ng tizza bo‘g‘imlarini ustki yuzalaridagi shilinmalar aniqlanib, bu tan jarohatlari 6 kundan ko‘p davom etmaydigan yengil shikastlar toifasiga kirishi ko‘rsatilgan.
Videodagi ayol D.U.da ham yengil shikastlar bo‘lgan hamda ekspertiza xulosasida ko‘rsatilgan. Qo‘shimcha sud tibbiy ekspertizasining 2021-yil 1-martdagi xulosasida D.U.ning yuz sohasida ozgina seziladigan chandiq mavjud bo‘lib, chap ko‘z ostidagi yuzaki jarohatning bitganidan qolganligi va bu jarohat bitib ketadigan jarohatlar turkumiga kirishi, shuningdek, ushbu chandiq yuz assimetriyasiga va funksional o‘zgarishlarga sabab bo‘lmaganligi qayd etilgan.
Milliy gvardiya “Dinamo” jismoniy tarbiya-sport jamiyatining 2020-yil 5-oktabrdagi buyrug‘i bilan harbiy xizmatchi A.M. D.U.ni haqorat qilib, unga qasddan yengil tan jarohati yetkazgani sababli unga nisbatan Ma’muriy javobgarlik to‘g‘risidagi kodeksning 16-moddasi tartibida hayfsan intizomiy jazo chorasi qo‘llanilgan.
Sud D.U.ning suddagi, N.M., D.M. va A.M.ning esa surishtiruvdagi ko‘rsatmalarini eshitib, yakuniy xulosaga kelgan. Qaror bilan ayollarning har biriga nisbatan yuqoridagi moddalar bilan bazaviy hisoblash miqdorining bir baravari (18-aprel holatiga ko‘ra, 245 ming so‘m)dan jarima jazolari tayinlangan.
Izoh (0)