Ходимларини ҳақорат қилган Тошкент вилояти Ангрен шаҳар Мажбурий ижро бюроси бўлими бошлиғи Моҳизода Юсуповага ҳайфсан берилди. Бу ҳақда бюро матбуот котиби Фарруҳ Тошпўлатовга таяниб, «Gazeta.uz» хабар берди.
14 апрель куни ижтимоий тармоқларда Моҳизода Юсупова режани бажармаган ходимларини уятли сўзлар билан ҳақоратлагани, уларни ярим тунда бошқармага чақириш билан таҳдид қилгани ёзилган аудио тарқалган эди.
Хизмат текшируви давомида аниқланишича, 7 апрель куни МИБ бўлим бошлиғи «аёллар», «темир» ва «ёшлар» дафтарлари бўйича қарздорликни ундириш камайгани бўйича маълумот олган.
«Ушбу йўналишлар бўйича қарздорликни ундириш ҳар бир ходимга ўртача 10 тадан тўғри келади. У айрим ходимларнинг ўз вазифасига масъулиятсиз ёндашиши қолган ишчиларнинг иш кайфиятига таъсир кўрсатади деб ҳисоблаб, жаҳли чиққан ва Telegram орқали ҳақоратли сўзлар ёзилган аудиони юборган», — дея изоҳ беради МИБ.
Фарруҳ Тошпўлатовнинг сўзларига кўра, Моҳизода Юсупова қилган ишидан жуда пушаймон ва айбини тан олади.
Маълум қилинишича, Моҳизода Юсуповда Мажбурий ижро бюросида 2017 йилдан буён ишлаб келади, Ангрен шаҳар МИБ бўлими бошлиғи лавозимига эса 2018 йилда ўтирган. Бунга қадар 20 йил давомида у Суд департаментида турли лавозимларда фаолият юритган. Уни «қаттиққўл, масъулиятли ва талабчан» деб таърифлашади.
Натижада Юсуповага ҳайфсан эълон қилинган, 7 нафар ходим билан эса уларнинг масъулиятини ошириш ва меҳнат ҳамда ижро интизомига риоя қилишлари бўйича профилактик суҳбат ўтказилган.
МИБ матбуот котибининг таъкидлашича, бюро ходимлари ўртасида мансаб ваколатларини суиистеъмол қилиш ва нотўғри хатти-ҳаракатларнинг олдини олиш, шунингдек, раҳбарларнинг бўйсунувчилар билан ижобий ва одобли муомаласини, меҳнат ва ижро интизомига риоя этилишини таъминлаш бўйича чоралар кўрилади.
Аввалроқ МИБ Ангрен шаҳар бўлими бошлиғининг ўз ходимларига нисбатан ҳақоратомуз муносабати Сенат назоратига олингани тўғрисида хабар берилганди.
Изоҳ (0)