Санитария-эпидемиологик осойишталик ва жамоат саломатлиги хизмати раҳбари Баҳодир Юсупалиев жамоат ва таровиҳ намозларида 65 ёшдан катталар ва болаларнинг иштирок этишини чеклаш таклифини билдирди. Бу ҳақда у Абдулла Арипов бошчилигида коронавирусга қарши кураш комиссиясининг кенгайтирилган йиғилишида маълум қилди, деб хабар беради «Дарё» мухбири.
«Республикамизда ‘британча’ штамм қайд этилган. Бу инфекция болалар ўртасида кўпроқ учрайди, дегани. Шу билан бирга, унинг тарқалиши анча тезроқ. Биринчи навбатда болалар касалланса, уйдаги кексалар юқтириш эҳтимоллиги бор», — дейди Юсупалиев.
Шунингдек, йиғилишда муқаддас Рамазон ойида таровиҳ намозларини очиқ ҳудудларда адо этиш бўйича кўрсатма берилган.
Бош вазир Абдулла Арипов чекловлар инсонлар соғлиғини ўйлаб амалга оширилаётганини қайд этган.
«Эътиқодни ҳеч ким тақиқлаб қўя олмайди, бу мумкин эмас. Аммо чеклаш деган нарсани ҳаттоки, кечирасизлар-у, Рим католик черковининг бош идораси ҳам одамларнинг диний маросимларда қатнашишини бекор қилди…
Шунинг учун бошқа диний конфессияларга ҳам бу каби маросимларни ўтказишни чеклаш бўйича топшириқ бериш керак. Бу ҳукумат комиссиясининг қарори», — дейди Арипов.
Аввалроқ Абдулла Арипов бошчилигида коронавирусга қарши кураш комиссиясининг кенгайтирилган йиғилиши бошлангани, Ўзбекистонга коронавируснинг «африкача» штамми кириб келгани, 18 апрелдан карантин талаблари кучайтирилиши, қоидабузарлар қатъий жавобгарликка тортилиши тўғрисида хабар берилганди.
Изоҳ (0)