Ўзбекистон Олий Мажлис Сенати айрим йўналишлардаги «самолётлар турлари бир хил» бўлса ҳам авиачипталар нархи «ҳаддан ортиқ қиммат»лигини маълум қилди.
Хусусан, парламент юқори палатасининг маълумотларига кўра, бугунги кунда парвоз вақти 1 соат 10 дақиқа бўлган Тошкент–Олмаота йўналиши бўйича авиачиптанинг нархи фақат бир тарафга 4,7 миллион сўмни ташкил қилмоқда. Ҳолбуки, парвоз вақти 3 соат 40 дақиқадан иборат Тошкент–Москва йўналиши бўйича авиачипта нархи 4,2 миллион сўм, Тошкент–Рига йўналиши бўйича 2,8 миллион сўм (парвоз вақти 5 соат 30 дақиқа), Тошкент–Нью-Йорк йўналиши бўйича эса 6,5 миллион сўм (парвоз вақти 12 соат) этиб белгиланган.
«Кўриниб турибдики, парвоз вақти 1 соат 10 дақиқа бўлган Тошкент–Олмаота йўналиши бўйича авиачиптанинг нархи ундан бир неча соат кўп парвоз қилинадиган йўналишлар учун белгиланган нархлардан сезиларли даражада юқоридир. Ушбу ‘тушунарсиз ҳолат’ фуқароларимиз учун қатор қийинчиликларни юзага келтирмоқда», — дейилади хабарда.
Сенат маълумотларига кўра, аҳоли билан жойларда ўтказилган мулоқотлар ва тегишли таҳлиллар шуни кўрсатганки, масъуллар нарх белгилашда фуқаролар тушиб қолган танловсиз, мураккаб вазиятдан инсофсизларча фойдаланмоқда.
«Бундан ташқари, Қозоғистонга чегарадан пиёда ёки автотранспорт воситасида ўтишга Қозоғистон томонидан пандемия сабабли тақиқ қўйилган ва бизнинг масъулларимиз ана шундай шароитда фуқароларимиз мажбурлигидан ҳам қиммат нархда чипта сотиб олаверади, деган ишонч билан ўз юртдошларининг манфаатларига зид ҳаракат (ёки ҳаракатсизлик) қилмоқда», — дея таъкидланади хабарда.
Сенат Монополияга қарши курашиш қўмитаси раиси Шоҳрух Шораҳмедовга Тошкент–Олмаота йўналиши бўйича авиачипталар ҳаддан зиёд юқори нархда сотилаётганлигини ўрганиб чиқиш ва натижаси борасида маълумотларни тақдим этиш юзасидан сенаторлар сўровини юборган.
Аввалроқ Олий Мажлис Сенатининг Мудофаа ва хавфсизлик масалалари қўмитаси раиси Қутбиддин Бурҳонов Uzbekistan Airways АЖ бошқаруви раиси вазифасини бажарувчи Илҳом Маҳкамовга чипталар сотувини соддалаштириш бўйича сўров юборганди.
Изоҳ (0)