Ўзбекистонга апрель охирига қадар яна 1 миллион дона Хитой вакцинаси олиб келинади. Бу ҳақда Абдулла Арипов коронавирусга қарши кураш комиссиясининг кенгайтирилган йиғилишида маълум қилди, деб хабар беради «Дарё» мухбири.
«Ўтган куз мавсумида 1,2 миллион кишини гриппга қарши эмлаган эдик, бу жуда катта эффект берди. Жорий мавсумда Президент буни 1,6 миллион кишига етказиш бўйича топшириқ берди.
Касаллик аниқланган ҳолларда бемор билан мулоқотда бўлганлар билан ишлаш тизимини кучайтириш, бирламчи тиббий бўғин масалалари томонидан карантинга олинган фуқаролар ва уларнинг оила аъзоларининг кунлик тиббий назоратини Соғлиқни сақлаш вазирлиги, маҳаллий идоралар билан кучайтириш керак.
Уй шароитида даволанаётган беморлар ва карантинга олинган шахсларга тиббий маслаҳат беришга қаратилган Call-марказ фаолиятини қайта йўлга қўйиш керак», — дейди Абдулла Арипов.
Шунингдек, бош вазир вилоятлар зарурий тиббиёт ва дори-дармон воситалари захираларини яратишига ҳам алоҳида тўхталиб ўтган.
«Фақат Тошкент шаҳри, Хоразм вилояти, қисман Самарқанд ва Қашқадарё вилоятлари бу талабни бажарди (дори-дармон захираси — таҳр). Қолганлар давлат захираси бор-ку, деб юрибди.
Абдулла Арипов бош вазир ўринбосари Беҳзод Мусаевга бир ҳафтадан кейин ҳудудларга вакилларни чиқариб, захира яратилганини текшириш топшириғини берди. Қорақалпоғистон Республикаси Вазирлар Кенгаши, Тошкент шаҳар ҳокими ва вилоят ҳокимларига поликлиника ва оилавий шифокорлик пунктлари қошида мобил бригадаларни қайта ташкил этиш ва уларни махсус автотранспорт воситалари билан таъминлаш вазифаси қўйилди.
Бош вазирнинг айтишича, апрель охирига қадар 300 минг дона «Спутник V» ҳамда 1 миллион дона Хитой вакциналари олиб келинади. Бу бўйича шартнома имзоланган, пули тўланган, ҳатто рейслари ҳал этилган.
Эслатиб ўтамиз, аҳолини коронавирусга қарши эмлаш тадбирлари 1 апрелдан вилоятлар марказлари ва катта шаҳарлардан бошланди. Май ойида эмлаш тадбирлари туман марказлари ва кичик шаҳарларда амалга оширилади. Июнь ойида эса бошқа аҳоли қатлами эмланади.
Ўзбекистонда бугунги кунда 1 миллион 660 минг доза вакцина бор. Уларнинг 660 минг дозаси COVAX жамғармаси томонидан олиб келинган AstraZeneca вакцинаси, 1 миллион дозаси — Ўзбекистон—Хитой ҳамкорлигида ишлаб чиқилган ZF-UZ-VAC 2001 вакцинаси.
Мавзуга доир:
- Ўзбекистонда 18 апрелдан карантин талаблари кучайтирилади. Қоидабузарлар қатъий жавобгарликка тортилади
- «Керак бўлса, бир-иккитаси ишдан кетади». Абдулла Арипов карантин қоидаларига риоя қилмаётган давлат идоралари раҳбарларини танқид қилди
- «Ўзбекистонга коронавируснинг ‘африкача’ штамми кириб келган» — Абдулла Арипов
Изоҳ (0)