Ўзбекистон халқ артисти Мирза Азизов 16 апрель, жума куни 58 ёшида вафот этди. Ижтимоий тармоқларда Мирза Азизовнинг касалхонада даволанаётган пайтдаги аудиоси тарқалди. Овозли хабарда таниқли актёр Зангиотадаги касалхонада оилавий ётганини, аҳволи оғир эканлигини айтади.
Ижтимоий тармоқларда Мирза Азизовнинг рафиқаси Тожибар Азизова ҳам ҳозирда коронавирусдан даволанаётгани ҳақида айтилмоқда.
«Ассалому алайкум, Роҳилахон, яхшимисиз, қизим, чарчамасдан юрибсизми? Биз оилавий ковид бўлиб, Зангиотага тушиб қолдик. Ҳаммамиз оилавий ётибмиз. Мен сал оғирроқман, Тожибар опангиз анча яхши», — дейди актёр овозли хабарда.
Шунингдек, Қирғизистонда хизмат кўрсатган артист Самара Каримова Мирза Азизов билан охирги ёзишмаси скриншотини эълон қилди. Мирза Азизов 3 апрель куни хонандага «Менда оғирроқ ўтяпти, секин-секин яхши бўляпман», деб ёзган.
«Milliy» телеканалининг «М-kokteyl» кўрсатувида Мирза Азизовнинг коронавирус оқибатида вафот этгани айтилди. Кўрсатувда Мирза Азизовнинг «Болаларим, келинларим, турмуш ўртоғимни қийнаб, йиллаб бир жойда ётиб қолмай дейман. Кўп яшашни ҳамма хоҳлайди, лекин Худо қанча умр берган бўлса, уни мазмунли, яхшилар даврасида ўтказай, дейман», — дегани акс этган лавҳа ҳам намойиш этилди.
Изоҳ (0)