Туркманистон президенти Гурбангули Бердимуҳамедовнинг ўғли, мамлакат бош вазири ўринбосари ва Олий назорат палатасининг раҳбари Сердар Бердимуҳамедов отасининг ўрнига Ахалтекин отларини етиштириш бўйича ассоциациянинг президентлигига сайланди. Бу ҳақда Atavatan Turkmenistan нашрига асосланиб, «Интерфакс» хабар берган.
Ассоциацияга у ташкил қилингандан бери, яъни 2010 йилдан буён Гурбангули Бердимуҳамедов раҳбарлик қилиб келаётганди, унинг ўзи 16 апрелда ўтказилган йиғилишда бошқа бир муносиб номзодни ассоциация президентлигига сайлашни таклиф этган. Ассоциация вакиллари бош вазир ўринбосари Сердар Бердимуҳамедов номзодини илгари сурган ва маъқуллаган.
Сердар Бердимуҳамедов бир овоздан ассоциация президентлигига сайланган. У янги лавозимга киришиш олдидан ахалтекин отларининг довруғини бутун дунёга кўз-кўз қилиш, чавандозлик миллий санъатини янада ривожлантириш ҳамда ахалтекин отларининг дунё миқёсидаги обрўсини янада ошириш учун бор кучини сафарбар этишга тайёрлигини билдирган.
Шунингдек, ушбу йиғилишда Халқ маслаҳати Парламент палатасининг қарори билан президент Гурбангули Бердимуҳамедовга «Туркманистон отларининг мураббийи – маҳоратли устоз» фахрий унвони берилган.
Мавзуга доир: Бердимуҳамедов Наврўз куни туғилган тойчоққа Ашхобод деб ном қўйди ва пойтахтга бағишлаб шеър ёзди
Изоҳ (0)