Ўзбекистон Президенти Шавкат Мирзиёев 15 апрель куни Самарқанд шаҳрига келди, деб хабар беради Президент матбуот хизмати.
Маълум қилинишича, улкан бунёдкорлик ишлари билан танишув Самарқанд халқаро аэропортидан бошланган. Давлат раҳбари 2019 йили вилоятга ташрифи чоғида ушбу аэропортни модернизация қилиш бўйича кўрсатмалар берган эди.
Лойиҳа доирасида янги терминал, учиш-қўниш йўлаги, тураргоҳ ва бошқа объектлар барпо этилиши белгиланган. Бугунги кунда узунлиги 3105 ва эни 60 метр бўлган учиш-қўниш йўлаги қурилиши тугалланиб, ёритиш-сигнал чироқлари ва аэронавигация ускуналари ўрнатилмоқда.
Президент дастлаб халқаро авиация стандартлари асосида қурилган учиш-қўниш йўлагини кўздан кечирган.
Янги терминал замонавий дизайнга, бир соатда 800 нафар йўловчига хизмат кўрсатиш қувватига эга бўлади. Илгари бу кўрсаткич 400 нафар эди.
«Одамларга қулайлик яратиш асосий мақсад бўлиши керак. Бунинг учун «ақлли технологиялар»ни қўллаш, хизматларни арзон, сифатли, тезкор қилиш зарур», — деди Шавкат Мирзиёев.
Таъкидланишича, турли катталикдаги самолётлар учун 24 та тураргоҳ барпо этилмоқда. Шундан учтаси ҳаво кемаларига музлашга қарши ишлов бериш учун мўлжалланган бўлади. Аэропортда карго хизмати ҳам йўлга қўйилади. Давлат раҳбари бу масалага алоҳида тўхталиб, юк ташиш рақобатбордошлигини ошириш бўйича кўрсатмалар берган.
«Карго барқарор ва манфаатли бўлиши учун доимий юк керак. Бунинг учун самолётларга хизмат кўрсатиш, юкларни ортиш ва етказиб беришни арзон ва тез йўлга қўйиб, бошқа авиакомпанияларни жалб этиш зарур. Бундан ташқари, вилоятда экспортбоп мева-сабзавотларни кўпайтириб, уларни шу карго орқали жаҳон бозорига чиқариш мумкин», – дейди Президент.
Янги аэропортни 2021 йил сентябрда фойдаланишга топшириш режалаштирилган. Шундан сўнг, у «очиқ осмон» режимида тўлиқ ишлай бошлайди. 1000 киши иш билан таъминланади.
Маълумот учун, Самарқанд халқаро аэропорти 1967 йилда қурилган.
Эслатиб ўтамиз, февраль ўрталарида Шавкат Мирзиёев Самарқанднинг туризм салоҳиятини ривожлантиришга доир тақдимот билан танишганди.
Изоҳ (0)