Печенье, сабзавотли таом ёки гўштни печда пишириш учун доимо фольга ёки пергамент қоғоздан фойдаланишга тўғри келади. Аммо улар айнан нима учун мўлжалланганига қарамай, дуч келганини ишлатиш ҳолатлари кўп бора кузатилади. Қуйида иккисидан қачон ва қандай мақсадда фойдаланиш ҳақида тўлиқ маълумотга эга бўлиш мумкин.
Қандай маҳсулотлар фольга ёки пергаментга камроқ ёпишади?
Одатда пергамент қоғозлари ҳеч қачон пишириқ қолипларига ёпишиб қолмайди. Борди-ю ёпишган бўлса, демак қоғознинг сифатсиз туридан фойдаланилган бўлиш мумкин. Фольга қоғозлари эса икки хил бўлади. Юпқа фольгалар маҳсулот қизариб пишиши учун қўлланилади. Шунингдек, фольгалардан фойдаланишдан аввал уни ёғлаш ҳам мумкин. Айрим бекажонлар эса балиқ ёки гўшт пиширишда аввал тўғралган пиёзни жойлаштиради.
Қандолат қоғозларини ёғлаш шартми?
Бу асосан рецептга боғлиқ. Аксарият ҳолларда пергаментдан фойдаланилганда унга ёғ суртиш шарт эмас. Агар хамирли таом хамири жуда ёпишқоқ бўлса, қоғоз юзасига ун сепиш мумкин. Қолаверса, рецептда «қолипни ёғланг» дейилган банди мавжуд бўлса, у кўпроқ қандолат қоғозидан фойдаланмайдиганлар учун тегишли бўлади.
Фольганинг қайси томони билан пиширган маъқул?
Бу асосан фольганинг турига боғлиқ. Агар оддий ва қалин фольга бўлса, ҳар икки томонидан ҳам фойдаланиш мумкин. Лекин ёпишқоқ бўлмаган фольганинг товланмайдиган томони билан ишлатган маъқул.
Нима учун фольга ёки пергамент қоғози маҳсулотни бутунлай ёпиши керак?
Иккала қоғоз ҳам маҳсулот ёпишмаслиги ҳамда куймаслиги учун хизмат қилади. Шунингдек, жараёндан сўнг қолипларни ювиш осон кечади. Бундан ташқари, фольга ёки пергамент туфайли таомдаги ёғни камайтириш мумкин.
Печдаги сабзавотлар учун фольгами ёки пергамент?
Пергамент қоғозидан 210 даражагача бўлган ҳароратда фойдаланиш мумкин. Агар сабзавотлар юқори ҳароратда пиширилиши керак бўлса, фольгадан фойдаланган яхши. Қандай бўлмасин, сабзавотлар мазали ва юмшоқ бўлиши учун уларга зайтун мойини қўшиш тавсия этилади. Сўнгра фольгага ўралади. Шунингдек, картошкаларни печда пиширишганда қуруқ бўлиб қолмаслиги учун уларга бир нечта муз бўлакларини қўшиш керак. Иссиқликда эриган муз бўлаклари картошкага кераклича намлик беради.
Печда пишириладиган товуқ ёки курка гўшти учун қалин фольга
Агар ушбу гўшт маҳсулоти тез муддатда пиширилиши керак бўлса, унда фольгадан фойдаланиш тавсия этилади. Фольга устига парранда гўшти жойлаштирилади, ёғ ва зираворлар сепилади. Сўнгра фольга билан ҳар томонлама ўралиб, икки тарафидан бироз тешик очилади. Гўшт тайёр бўлишига ярим соат қолганида фольга очилади. Натижада гўшт қизариб пишади.
Аммо парранда гўшти узоқроқ муддатда пишиши керак бўлса, пергамент қоғозидан фойдаланиш мумкин. У ҳам худди фольга қоғоз каби ишлатилади, аммо ярим соат қолганида қоғозлар бутунлай олиб ташланади ва гўшт қизаргунча пиширилади. Одатда пергамент бу каби мақсадлар учун унчалик ҳам мос эмас.
Балиқ учун фольга ва пергамент
Балиқ учун иккисидан ҳам бирдек фойдаланиш мумкин. Агар балиқни сабзавотлар билан бирга пишириш керак бўлса, пергамент қоғозга ўралади. Шунда балиқ юмшоқ ва сувли бўлиб пишади. Унинг қизариб пишишини хоҳлайдиган бекажонлар қалин фольгага ўраб, тайёрлаши мумкин.
Печенье учун пергамент
Печеньелар пергамент қоғозида пиширилса, улар бир текисда пишади, кўриниши бузилмайди ва ёрилиб кетмайди. Фольгадан фойдаланилса, ширинликлар ранги бироз тўқроқ чиқиши мумкин.
Пирог учун қандолат қоғози
Катта думалоқ шаклни фольга ёки пергамент қоғозидан чиқариб олиш анча қийин. Шунинг учун бекажонлар осонгина қандолат қоғозидан фойдаланади. Ундан керакли шаклни кесиб олиш мумкин ва бу пирог шаклига ҳам зарар етказмайди.
Мавзуга доир:
Изоҳ (0)