Айни пайтда Президент Шавкат Мирзиёев раислигида ўтказилаётган йиғилишда давлат раҳбари республикадаги мавжуд 120 та IT-марказларни тамомлаган 4 мингга яқин «ёшлар дафтари»даги йигит-қизларни компьютерлар билан таъминлаб бериш зарурлигини қайд этди, дея хабар бермоқда «Дарё» мухбири.
«IT-марказларни тамомлаган 4 мингга яқин ‘ёшлар дафтари’даги ёшларни келгусида бизнес бошлаши учун компьютерлар билан таъминлаб бериш зарур. Бунинг учун, ‘Бир миллион дастурчи’ лойиҳаси доирасида сертификат олган ёшларга компьютерлар хариди учун ‘Микрокредитбанк’, ‘Алоқабанк‘ ва ‘Халқ банки’ кредитлар ажратади, уларнинг фоиз харажатлари тўлиқ бюджетдан қоплаб берилади яъни, кредит фоизсиз берилади.
Шунингдек, 1 июндан бошлаб ‘ёшлар дафтари’га киритилган ёшларга ва меҳрибонлик уйи тарбияланувчиларига ҳайдовчилик гувоҳномасини олиш, бир ойлик ҳарбий хизматни ўташ харажатлари бюджетдан тўлаб берилади.
Бундан ташқари, ‘ёшлар дафтари’га кирганларга, қизиқишидан келиб чиқиб, хорижий тиллар ва умумтаълим фанлари бўйича нодавлат таълим ташкилотларида ўқиш харажатининг бир қисми қопланади. Шу билан бирга, 1 июлдан бошлаб хусусий корхоналарда янги иш бошлаган ходимларни қайта тайёрлаш харажатининг 1 миллион сўмгача бўлган қисмига субсидия берилади. Ёшларнинг профессионал таълим мактаблари, техникумларда ўқиши учун тўланадиган контракт суммаси даромад солиғидан озод қилинади», – деди Шавкат Мирзиёев.
Президент ушбу мақсадлар учун Молия вазири Тимур Ишметовга Ёшлар агентлигига йил давомида қўшимча 100 миллиард сўм ажратиш бўйича топшириқ берди.
Бундан аввал Шавкат Мирзиёев Андижонда саноат корхоналари ва кластерларда 7 мингта доимий вакант иш ўринлари мавжуд эканини маълум қилгани, ёшлар билан ишлашни эплай олмаган бир қатор амалдорларни ишдан олгани ҳамда ССП раисини «1+1» дастури орқали 1 млн йигит-қизни қамраб олмаса, ишдан олиниши ҳақида огоҳлантиргани ҳақида хабар қилинганди.
Изоҳ (0)