Ўзбекистондаги 648 минг нафар ишсиз йигит-қизлар «Ёшлар дафтари»га киритилган бўлса, шундан биринчи чоракда 282 минг нафарининг бандлиги таъминланди. Бу ҳақда айни пайтда Президент Шавкат Мирзиёев раислигида ёшлар масалаларига бағишлаб ўтказилаётган видеоселектор йиғилишида маълум қилинди, дея хабар бермоқда «Дарё» мухбири.
Январь ойида ўтказилган йиғилишда 2 та устувор йўналиш – ёшларнинг бандлиги ва уларнинг бўш вақтини мазмунли ташкил этиш бўйича топшириқлар берилган эди. Бугунги йиғилишда вазирлар, вилоят, туман ва шаҳар ҳокимлари, сектор раҳбарлари, ректорлар бу борада ишларни қандай ташкил этгани, ярим йилликда, 9 ой ва йил якунига қадар эришиладиган аниқ натижалар юзасидан ҳисобот берадилар.
«Республика бўйича 648 минг нафар ишсизлар ‘Ёшлар дафтари’га киритилган бўлса, шундан биринчи чоракда 282 минг ёшларнинг бандлиги таъминланди. Бу жуда паст кўрсаткич. Хусусан, 175 минг нафар ёшга 45 минг гектар ер майдони ажратилди, 76 минг нафар ёшлар доимий ва жамоат ишларига жойлаштирилди, 33 минг нафарига тадбиркорлик фаолияти учун 800 миллиард сўм кредит, 6 минг нафарига субсидия ажратилиб, бандлигига кўмаклашилди», – деди давлат раҳбари.
Таъкидланишича, ёшларнинг бўш вақтини мазмунли ўтказиш мақсадида 36 мингта қўшимча турли тўгараклар ташкил этилиб, 874 мингга яқин йигит-қизлар жалб этилган. «Беш муҳим ташаббус» доирасида 97 мингта маданият, спорт инвентарлари ва компьютерлар, 562 мингта бадиий китоб таълим муассасалари, кутубхона ва ўқув марказларига етказиб берилган.
Бундан аввал Шавкат Мирзиёев ёшлар билан ишлашни эплай олмаган бир қатор амалдорларни ишдан олгани ҳақида хабар берилганди.
Изоҳ (0)