Uzcard ва Humo тўлов тизимлари ҳамкорлик тўғрисидаги меморандумни имзолади. Бу ҳақда Ягона умумреспублика процессинг маркази Spot’га маълум қилди.
Маълум қилинишича, компаниялар бир нечта қўшма лойиҳаларни ишга туширади. Улардан бири инфратузилмаларни босқичма-босқич интеграциялашдир. Терминаллар 2021 йил охиригача ҳар иккала турдаги карталарни қабул қилишни бошлаши кутилмоқда.
«Бу карта эгалари, банклар ва бизнес эгаларига сезиларли фойда келтиради. Харидорларга савдо нуқтаси қайси терминаллардан фойдаланиши ҳақида ўйлашнинг ҳожати йўқ, тадбиркорлар эса иккала картадан тўловларни битта терминал орқали қабул қилишлари мумкин», — деган Humo директори Шуҳратбек Қурбонов.
Шу билан бирга, унинг айтишича, Uzcard ва Humo рақобат муҳитини яратишда давом этади.
«Ҳамкорлик молиявий хизматларни фуқаролар учун янада қулайроқ ва енгил қилади. Бу ўз навбатида, компанияларни янги технологияларни ишлаб чиқиш, тўлов бизнесини ривожлантириш ва хизмат кўрсатиш сифатини оширишга туртки беради», — деган Uzcard директори Фаррух Зияев.
Унинг сўзларига кўра, бу ҳам адолатли рақобатни ривожлантиришга ва бозорда янги иштирокчилар пайдо бўлишига ёрдам беради.
Марказий банки раиси Мамаризо Нурмуратов 2020 йилнинг сентябрида Humo ва Uzcard карталари ўзаро интеграцияланиб, ушбу карта эгалари иккала тўлов тизимининг банкоматлари ва терминалларидан фойдаланишлари мумкин бўлишини маълум қилганди.
Humo ва Uzcard тўлов тизимларини интеграциялаштириш Вазирлар Маҳкамасининг 2020 йил 20 июндаги «Ўзбекистон республикасида ‘яширин иқтисодиёт’ улушини қисқартириш чора-тадбирлари тўғрисидаги қарорида ҳам кўзда тутилган.
Мавзуга доир: Uzcard компаниянинг янги йўналишини эълон қилди
Изоҳ (0)