Бугунги кунда Ўзбекистонда 130 мингдан зиёд олийгоҳ талабалари ижарада яшамоқда. Бу ҳақда Президент Шавкат Мирзиёев раислигида ўтказилган йиғилишда маълум қилинди, дея хабар бермоқда «Дарё» мухбири.
«Ижарада яшаётган талабаларга 1 майдан бошлаб ижара тўловининг ярми давлат томонидан қоплаб берилади. Бу масалани ҳал қилиш бўйича ҳукумат томонидан алоҳида дастур тайёрланмоқда. Дастлабки босқичда ушбу тизим орқали 60 минг нафар ёшлар қамраб олинади.
Шу билан бирга, эҳтиёжманд талабаларга ушбу харажатлар ҳокимликлар ва олийгоҳлар маблағи ҳисобидан ҳам қоплаб берилади. Молия вазири Тимур Ишметов ушбу мақсадлар учун 100 миллиард сўм ажратади.
Абдуқодир Тошқулов ва Тимур Ишметов, ректор ва вилоят молия бошлиқлари икки ҳафта муддатда ижарада турган талабалар билан учрашиб, 1 майдан тўловларни бошлайди», – деди Шавкат Мирзиёев.
Бундан аввал Шавкат Мирзиёев ёшлар муаммоларини фақатгина Ёшлар агентлиги ёки Ёшлар иттифоқининг ўзи ҳал қилади, деб ўйлаш хато бўлиши, 2021 йилнинг биринчи чорагида 33 минг нафар ёшга тадбиркорлик фаолияти учун 800 миллиард сўм кредит ажратилганини маълум қилгани ҳамда ёшлар билан ишлашни эплай олмаган бир қатор амалдорларни ишдан олгани ҳақида хабар берилганди.
Изоҳ (0)