Турмада жазо ўтаган шахс террористик ташкилот тарафдори эканлиги аниқланди. Бу ҳақда Навоий вилоят ҳокимлиги ахборот хизмати хабар берди.
Қайд этилишича, фарғоналик фуқаро У.А. (исми-шарифи ўзгартирилган) муқаддам содир этган ўғрилик жиноятлари учун беш маротаба судланган, охирги марта 2015 йилда содир этган ўғрилик жинояти учун судланиб, жазони ижро этиш колониясида озодликдан маҳрум қилиш жазосини ўтаб келаётган бўлган.
Жиноят иши ҳужжатлари ҳамда судда аниқланган ҳолатларга кўра, маҳкум У.А Навоий шаҳридаги 11-сонли жазони ижро этиш колониясида жазо муддатини ўташ давомида, яъни 2018 йилнинг ноябрь ойидан 2019 йил январь ойига қадар «Ислом халифалиги давлати» қуришни ўз олдига мақсад қилиб, бутун дунёда, жумладан, Ўзбекистон ҳудудида фаолият олиб бориши тақиқланган «Ҳизб ут-Таҳрир ал-Исломий» халқаро террористик ташкилотнинг ғояларини қўллаб, террористик ташкилот ғоялари билан йўғрилган варақаларни қўлёзма шаклида, матндаги айрим сўзларни қисқартирган ҳолда тайёрлаб, турма участкасидаги маҳкумларга тарқатган.
Жиноят ишлари бўйича Навбаҳор туман суди томонидан 2021 йил 12 март куни У.А.га нисбатан бўлган жиноят иши суд муҳокамасида кўриб чиқилган ва унинг айби судда тўлиқ ўз тасдиғини топган.
Суд томонидан У.А.га нисбатан Жиноят кодекси 159-моддасининг 1-қисми (Ўзбекистон Республикасининг конституциявий тузумига тажовуз қилиш) ва 244-1-моддаси (жамоат хавфсизлиги ва жамоат тартибига таҳдид соладиган материалларни тайёрлаш, сақлаш, тарқатиш ёки намойиш этиш) 2-қисми билан Жиноят кодексининг 59, 60-моддалари тартибида озодликдан маҳрум қилиш жазоси тайинланиб, жазони қаттиқ тартибли колонияда ўташ белгиланди.
Эслатиб ўтамиз, Ўзбекистонда 2021—2023 йиллар давомида қамоқхона ходимлари бодикамера билан таъминланади. Маҳкумларнинг жазони ўташ тартибини бузиш ҳолатларини аниқлаш мақсадида кузатиш ва мустақил назорат қилиш имкониятига эга интеллектуал камералар (Smart) тизими муассасаларга ўрнатилади.
Изоҳ (0)