1947 йилнинг 20 ноябрь куни турмуш қурган қиролича Елизавета ва шаҳзода Филипп 73 йил бирга яшаган. 2021 йил 9 апрель куни Филипп вафот этгунига қадар бахтли ҳаёт кечирган, яхши ва ёмон кунларни бирга баҳам кўрган жуфтликнинг севги ҳикоясидаги энг эсда қоларли деталларни эътиборингизга ҳавола этамиз.
1939 йил июль: Биринчи учрашув
Навал қироллик коллежига ташриф буюрган қирол Жорж VI ва қиролича Елизавета, 18 яшар Филиппдан қизлари Елизавета ва Маргаретни кузатиб қўйишини сўраган. Шундан буён у ва бўлажак қиролича (у вақтда 13 ёшда бўлган) бир-бири билан мактуб орқали гаплашган.
1947 йил июль: Унаштирув
Қисқа расмий мактубда қироллик рухсатига биноан малика Елизавета ва лейтенант Филипп Маунтбеттен унаштирилгани айтилган.
1947 йил ноябрь: Тўй
Елизавета ва Филипп Вестминстер аббатлигида 2000 нафар меҳмон қаршисида турмуш қурган.
1948 йил ноябрь: Шаҳзода Чарльз дунёга келган
14 ноябрь куни жуфтлик ўғил фарзандли бўлган ва унга Чарльз Филипп Артур Жорж деб исм қўйилган.
1950 йил август: Аннанинг дунёга келиши
Малика Анна Элизабет Элис Луиза 1950 йилнинг 15 августида таваллуд топган.
1952 йил февраль: Қиролнинг ўлими
Амалдаги монархнинг уйқу вақтида жони узилгани ҳақида хабар берилганда Елизавета ва Филипп Кенияда бўлган. Елизавета тахтга ўтириш учун биринчи даъвогар бўлган. Лондонга қайтган маликанинг оиласи Букингем саройига кўчиб ўтган.
1953 йил июнь: Тож кийдириш маросими
8000 меҳмон иштирок этган маросимни ойнайи жаҳон орқали 20 миллиондан ортиқ томошабин томоша қилган. Елизавета 2 июнь куни тахтга ўтирган, Филипп унга садоқатли бўлишга онт ичган.
1960 йил февраль: Эндрюнинг таваллуди
Жуфтлик 19 февраль куни турмуш қурган ва унга Эндрю Альберт Кристиан Эдвард исмини қўйган. Бир неча кундан кейин Елизавета II бошқа монарх оилаларидан ажралиб туриши учун авлодлари Маунтбеттен Виндзор фамилиясини олишини маълум қилган.
1964 йил март: Эдварднинг дунёга келиши
Қироличанинг энг кенжа ўғли Эдвард Энтони Ричард Льюис 10 март куни дунёга келган.
1972 йил ноябрь: Кумуш тўй (25 йиллик турмуш)
Кумуш тўй муносабати билан жуфтликка дунёнинг турли бурчагидан 15 мингдан ортиқ табрикларни ўзида акс эттирган мактуб ва 2500 телеграмма юборилган.
1977 йил ноябрь: Биринчи набира
Малика Анна 1977 йилнинг 15 ноябрида Питер Марк Эндрю Филлипсни дунёга келтирган. Тинч ҳаёт кечиришни афзал билган Анна фарзандларининг қироллик мақомидан расман воз кечган.
1992 йил ноябрь: Аннус Ҳоррибилис (Даҳшатли йил)
1992 йил Елизаветанинг қироллик мажбуриятларини бажараётганига 40 йил бўлган. Бу йил нафақат Елизавета, балки бутун қироллик оиласи учун йўқотишларга бой йил бўлган. Шаҳзода Чарльз малика Диана билан 11 йиллик турмушига, шаҳзода Эндрю Сара Фергусон билан муносабатларига нуқта қўйган, Анна ҳам Марк Филлипс билан ажрашган.
1997 йил ноябрь: Олтин тўй (50 йиллик)
Лондонда байрамона тушлик бўлиб ўтган. Елизавета турмуш ўртоғи унинг ҳаётидаги энг асосий суянган тоғи эканини маълум қилган.
2012 йил июнь: Қўллаб-қувватлаш
Елизавета инфекция сабаб даволанаётган эридан хабар олиш учун шифохонага ташриф буюрган ва тахтга ўтирганининг 60 йиллигини нишонлашдан бош тортган.
2016 йил июнь: Қиролича таваллудининг 90 йиллиги
21 апрелда таваллуд топганига қарамай, Елизавета туғилган кунини июнь ойининг шанба кунида нишонлайди. Мазкур анъана қирол Жорж II дан қолган.
2019 йил, январь: Кўнгилсиз ҳодиса
Филипп автоҳалокат сабаб шифохонага олиб борилган ва шундан буён машина ҳайдамаган.
2021 йил февраль: Шаҳзоданинг аҳволи ёмонлашган
16 февраль куни аҳволи ёмонлашган Филипп шифохонага олиб борилган. Деярли бир ой даволанган шаҳзоданинг юраги операция қилинган. Аҳволи яхшиланганидан кейин уйга кетишга рухсат берилган.
2021 йил 9 апрель: Филиппнинг ўлими
Шаҳзода Филиппнинг ҳаётдан кўз юмгани 2021 йил 9 апрелда расман эълон қилинган. Ўлимнинг сабаби маълум қилинмаган. У ва қиролича нафақат Британия монархлари орасида, балки дунёдаги энг узоқ вақт бирга умр кечирган жуфтликлардан саналади.
Изоҳ (0)