Ўзбекистон Соғлиқни сақлаш вазирлигининг «Саломатлик-3» лойиҳаси бўйича жиноий иш очилган. Лойиҳа доирасида амалга оширилган харидлар бўйича тўпланган материаллар тегишли тартибда текшириш учун ҳуқуқни муҳофаза қилиш органларига берилган. Бу ҳақда Ҳисоб палатаси раиси ўринбосари Баҳодир Туробов маълум қилди, деб хабар бермоқда UzNews.
Баҳодир Туробовга кўра, 2012—2018 йилларда «Саломатлик-3» лойиҳаси доирасида Жаҳон банкининг қарз маблағлари ҳисобига тиббиётнинг қуйи бўғинларига 108,5 миллион долларлик тиббий жиҳозлар харид қилинган.
Лекин ўрганишларда аниқланишича, юқори нархлар киритиш орқали лойиҳа қиймати 20,1 миллион долларга асоссиз оширилган. Шунингдек, лойиҳа доирасида 18,5 миллион долларлик маблағлар мақсадсиз ва ортиқча сарфланган, ёки керакли жиҳозлар ўрнига бошқа жиҳозлар режага нисбатан ортиқча харид қилинган. 19,1 миллион долларлик баъзи тиббий жиҳозлар эса 3 йилгача тиббий муассасасаларга тарқатилмай, омборхоналарда қолиб кетган.
Оқибатда қуйи тиббиёт бўғинларини етарли ва сифатли тиббий ускуна ҳамда жиҳозлар билан таъминлаш режаси бажарилмаган.
Қонунчилик палатаси депутати Дониёр Ғаниев ҳам бу ҳақда ўз фикрини билдириб, «Бу хато ва қонунбузилишлар бадали эса, минг афсуски, чекка худудларда оналар ва болалар ўлимлари билан тўланмоқда. Шу сабаб бу лойиҳа доирасида қонунбузарликка йўл қўйган, маблағларни талон-торож қилганлар, албатта, жазо олиши керак», — дея муносабат билдирган.
Аввалроқ Ҳисоб палатаси Ўзбекистонда 2020 йилда 671 миллиард сўмлик талон-торожлик ҳолатлари аниқлангани ҳақида маълум қилганди.
Изоҳ (0)