Бухоро вилояти Олот тумани «Халифа» МФЙда жойлашган «Imronnike» МЧЖ ҳудудидаги омборхонада ёнғин содир бўлди, деб хабар бермоқда вилоят ФВБ матбуот хизмати.
Омборхона ёнаётгани ҳақидаги хабар ёнғин-қутқарув хизматига 9 апрель куни соат 15:45 да келиб тушган. Воқеа жойига 10 та ёнғин-қутқарув экипажи соат 15:52 да етиб борган. Кўрилган тезкор ҳаракатлар натижасида ёнғин соат 16:20 да қуршаб олиниб, 18:26 да тўлиқ бартараф этилган.
Ҳодиса оқибатида корхона омборхонаси ички қисмининг тахминан 200 квадрат метр майдони ёниб, зарарланган. Ёнғиндан объектнинг 400 квадрат метр майдони сақлаб қолинган.
Мазкур ҳолат оқибатида тан жароҳати олганлар ва ҳалок бўлганлар қайд этилмаган. Ҳозирда ёнғин сабаби ва моддий зарар миқдорини аниқлаш ишлари олиб борилмоқда.
Аввалроқ Тошкент ва Зангиотадаги ишлаб чиқариш цехларида ёнғин содир бўлгани, Сирдарёдаги ўрмон хўжалигининг салкам 150 гектар майдони ёниб кетгани, Каттақўрғондаги ресторанларнинг бирида ёнғин содир бўлгани ҳақида хабар берилган эди.
Изоҳ (0)