Президент Шавкат Мирзиёевнинг матбуот котиби Шерзод Асадов 9 апрель, жума куни ўтказилган брифингда ҳафта давомида давлат раҳбари қатнашган учрашувлар ҳақида пресс-релизларда айтилмаган қўшимча тафсилотларни қайд этди, дея хабар бермоқда «Дарё» мухбири.
«5 апрель куни Эрон Ислом Республикаси ташқи ишлар вазири Муҳаммад Жавод Зариф билан учрашув бўлиб ўтди.
Эрон – бизнинг анъанавий шеригимиз, катта иқтисодий ва интеллектуал салоҳиятга эга давлат. Кейинги йилларда икки томонлама алоқалар фаоллашди. 2019 йилдан Эрон учун соддалаштирилган виза тизими жорий қилинди.
Учрашувда 2020 йилда мамлакатларимиз ўртасидаги савдо 250 миллион долларни ташкил этгани, қўшма корхоналар сони 3 баробар ортгани, қишлоқ хўжалиги, озиқ-овқат саноати, фармацевтика каби соҳаларда умумий қиймати 61 миллион долларлик қатор янги инвестиция лойиҳалари амалга оширилаётгани таъкидланди.
Хавфсизлик ва терроризмга қарши курашиш масалалари бўйича ҳамкорликни кенгайтиришга келишиб олинди. Дарвоқе, хавфсизлик кенгашлари ўртасида илк маслаҳатлашув механизми ўрнатилди.
Вазир Зариф 15-16 июль кунлари Тошкентда ўтказилиши режалаштирилган «Марказий ва Жанубий Осиё: минтақавий ўзаро боғлиқлик. Таҳдидлар ва имкониятлар» мавзусидаги юқори даражадаги халқаро конференцияда иштирок этишини тасдиқлади», — деди Президент матбуот котиби.
Изоҳ (0)