Президент Шавкат Мирзиёевнинг матбуот котиби Шерзод Асадов 9 апрель, жума куни Миллий матбуот марказида ўтказилган брифингда давлат раҳбарининг келаётган ҳафтада Покистон Ислом республикаси бош вазири Имрон Хон билан видеомулоқот ўтказиши мўлжалланганини маълум қилди, дея хабар бермоқда «Дарё» мухбири.
«Маълумки, Ўзбекистон билан Покистонни умумий тарих, ягона дин ва ўхшаш маданият боғлаб туради. Кейинги йилларда давлатлар ўртасидаги дўстлик мустаҳкамланиб бормоқда. Пандемияга қарамасдан, мулоқотлар ва ўзаро ташрифлар фаол давом эттирилмоқда. 2021 йил 8 февраль куни Покистон бош вазирининг маслаҳатчиси Абдул Разоқ Довуд бошчилигидаги делегация Ўзбекистонга келди.
2020 йил якунларига кўра, икки томонлама товар айирбошлаш ҳажми 123 миллион доллардан ошган. Ўзбекистон савдо-иқтисодий ва транспорт-логистика соҳаларида ҳамкорликни кенгайтиришдан манфаатдор», — деди Асадов.
Унинг таъкидлашича, навбатдаги мулоқотда икки мамлакат ўртасидаги савдо-иқтисодий ва инвестициявий ҳамкорликни ривожлантириш, Марказий ва Жанубий Осиёни боғлайдиган транспорт коммуникацияларини барпо этиш масалалари муҳокама қилинади.
Мавзуга доир:
Изоҳ (0)