Олис ва чекка ҳудудларда жойлашган ер участкаларининг бошланғич нархини 50 фоизгача чегирма билан сотувга қўйиш ваколатини маҳаллий кенгашларга бериш тартиби ишлаб чиқилади. Бу ҳақда 8 апрель куни Президент Шавкат Мирзиёев раислигида бўлиб ўтган видеоселектор йиғилишида маълум қилинди, дея хабар бермоқда «Дарё» мухбири.
Президент бир ой муддатда олис ва чекка ҳудудларда жойлашган ер участкаларининг бошланғич нархини 50 фоизгача чегирма билан сотувга қўйиш ваколатини маҳаллий кенгашларга бериш тартибини ҳукуматга киритиш ҳақида вазифа берди.
Шунингдек, давлат раҳбари вилоят, туман, шаҳар ҳокимлари бир ой муддатда кўп қаватли уйларнинг ертўласини хатловдан ўтказиб, тикувчилик, маиший техника, пойабзал таъмирлаш ва компьютер хизматлари каби фаолият турлари учун ажратиб беришни бошлаш ҳақида кўрсатма берди.
«Бунда ҳукумат томонидан бир ой муддатда бу ертўлалардан фойдаланишдаги чекловларни қисқартириш бўйича қарор қабул қилинсин», – деди Шавкат Мирзиёев.
Бундан аввал Шавкат Мирзиёев уч ой ичида сектор раҳбарлари тадбиркорлар билан ишлашда натижа қилмаса, ишдан олиниши ҳақида огоҳлантиргани, Қашқадарё ва Навоий ҳокимларига огоҳлантириш бергани ҳамда туман ва шаҳар сектор раҳбарлари кичик тадбиркорлар билан кунига 3 марта, керак бўлса, кечаси ҳам учрашиши бўйича кўрсатма бергани ҳақида хабар берилганди.
Изоҳ (0)