Украина президенти Владимир Зеленский 5- ва 6 апрель кунлари НАТО бош котиби Йенс Столтенберг, Буюк Британия ва Канада бош вазирлари Борис Жонсон ва Жастин Трюдо билан музокаралар ўтказди. Зеленский Жонсон ва Трюдодан Россияга халқаро босимни кучайтиришни ва Украина учун НАТОга аъзолик ҳаракатлари режасини (МАP) ишлаб чиқишга ёрдам беришни сўради. Бу ҳақда батафсил Meduza хабар берди.
Столтенберг билан суҳбатда Зеленский «НАТО — Донбассдаги урушни тўхтатишнинг ягона йўли» ва «МАP Россия Федерацияси учун ҳақиқий сигнал бўлади» деди. 7 апрель куни Литва НАТОга Украинани ушбу режа билан таъминлашни таклиф қилмоқчилигини маълум қилди.
Кремль Украинанинг НАТОга аъзо бўлиши Донбассдаги инқирозни янада кучайтиради, деб ҳисобламоқда
«Бу Украинага қандайдир тарзда ички муаммоларини енгишда ёрдам беришига шубҳамиз бор. НАТОга қўшилиш ҳақида гап кетганда, одамларнинг фикрларини ҳеч қанақасига четлаб ўтмаслик керак. Ўзларини республикачилар деб эълон қилган бир неча миллион одамларнинг фикрини сўрасангиз, улар НАТОга аъзо бўлишни чуқур қабул қила олмаслигини тушунасиз», — деди Россия президенти матбуот котиби Дмитрий Песков.
АҚШ НАТОнинг янги аъзоларини бажонидил қарши олишини айтди. Аммо улар иттифоқ стандартларига жавоб бериши керак.
«Биз Украина ҳукуматини чуқур, кенг қамровли ва ўз вақтидаги ислоҳотларни амалга оширишга ундашда давом этмоқдамиз», — деди АҚШ Давлат департаменти вакили Нед Прайс. Россия ва Украина чегарасидаги кескинлашув фонида АҚШ Украинани НАТОга қабул қилиш жараёнини тезлаштиришни режалаштиряптими ёки йўқми, деган саволга жавобан Прайс АҚШ Украинадаги ислоҳотларни қўллаб-қувватлашини такрорлади. Оқ уй вакили Женифер Псакининг айтишича, АҚШ Украинанинг НАТОга интилишларини қўллаб-қувватлайди, аммо аъзолик тўғрисида қарорни иттифоқнинг ўзи қабул қилади.
Украина ҳозирча НАТОга кириш стандартларига жавоб бермайди
Хусусан, коррупция даражаси ва ҳал қилинмаган ҳудудий низолар туфайли Украина ҳали НАТО талабларига жавоб бермайди. Ташкилотнинг янги аъзоларни қабул қилишда иттифоқ низоми бўлган «НАТОни кенгайтириш бўйича тадқиқотлар» деб номланган ҳужжатда, иттифоққа қўшилишни истаган мамлакатлар бундай келишмовчиликларни тинч йўл билан ҳал қилиши кераклиги айтилган. Аммо ҳужжатда айтилишича, НАТОга қўшилиш учун «доимий ёки қатъий мезонлар рўйхати» мавжуд эмас ва янги аъзоларни қабул қилиш тўғрисидаги қарорлар индивидуал тарзда қабул қилинади.
Украина НАТОга аъзо бўлиш ниятини 2002 йилда ҳам билдирган
2010 йилда Виктор Янукович президентлиги даврида мамлакат бетарафлик мақомини олди, бу эса ҳеч қандай ҳарбий-сиёсий иттифоқларга қўшилмасликни англатади. Аммо 2014 йилда Янукович ҳокимиятдан ағдарилиб, Қрим Россияга қўшилгандан сўнг, Украина НАТОга аъзо бўлиш йўналишини давом эттирди. 2019 йилда Украина конституцияси мамлакатнинг «Европа ва Евроатлантик йўналишларнинг қайтарилмаслигини» белгилаб берди. Энди Украина расмийлари 2030 йилгача НАТОга аъзо бўлишни кутмоқда.
Март ойининг охирида бутун дунё Донбассдаги вазиятнинг жиддийлашаётгани ҳақида гапира бошлади
Conflict Intelligence Team суриштирув гуруҳи Россия қўшинларининг Россия—Украина чегараси ҳудудида тўпланишини 2014—2015 йиллардан бери энг кескин кўрсаткич деб атади. Киев ўз чегаралари яқинида рус қўшинлари тўпланганини тасдиқлади ва уни «ўз кучини кўз-кўз қилиш» деб атади. АҚШ Россиядан мазкур «провокациялар»га изоҳ беришни талаб қилди, шунингдек, АҚШ президенти Жо Байден лавозимига келганидан бери биринчи марта Украина раҳбари Владимир Зеленскийга қўнғироқ қилди. Кремлнинг таъкидлашича, Россия ўз ҳудудида ўз қўшинларини ҳаракатга келтирмоқда ва «бу ҳеч кимни безовта қилмаслиги керак, қўшин ҳеч кимга таҳдид солмайди».
Изоҳ (0)