Ўзбекистон фармацевтика соҳаси ўзининг меъёрий ҳужжатларини Евросиё иқтисодий иттифоқи (ЕОИИ) талабларига мослаштиришни бошлади. Бу ҳақда «Иннопром» халқаро саноат кўргазмасида Фармацевтика тармоғини ривожлантириш агентлиги директори Сардор Қориев маълум қилди, деб хабар беради «Gazeta.uz».
Агентлик раҳбари ЕОИИ талабларини «жуда қаттиқ» деб атаб, барча маҳаллий корхоналар жаҳон стандартларига мос келиши кераклигини таъкидлаган.
Шунингдек, Сардор Қориев Ўзбекистон фармацевтика саноатининг ЕОИИ билан бирлашувининг плюс ҳамда минус томонларига тўхталиб ўтган.
«Плюс жиҳатларига келадиган бўлсак [ЕОИИнинг — таҳр.] — бу катта бозор. Фармбозорларнинг ‘мини-глоболизацияси’ бошқа мамлакатлардаги ривожланиш жадаллигини ушлаш имконини беради. Изоляцияланган бозорда мавжуд бўлиш доим осон. Аммо ташқи бозорга чиқилмаса, дунёда содир бўлаётган трендларни қўлдан чиқариш мумкин», — дейди у.
Қориев Россия биотехнологияси соҳасининг ривожланганини, Ўзбекистонда эса ушбу йўналиш энди ривожланишни бошлаганини мисол қилиб келтирган.
«Минус томонлари — жуда қаттиқ назорат. Бу каби интеграция, глобализация бор экан маҳаллий ишлаб чиқаришни қўллаб-қувватлаш бироз қийин. Чунки ҳаммага шартлар, талаблар бир хил… Яна бир минус жиҳати интеграция амалга ошмоқда, ўйин қоидалари бир хил ва кўплаб корхоналарга қийин бўлади. Яъни интеграцияга тайёр бўлмаган корхоналар фармбозорни тарк этишга мажбур бўлади», — дейди Сардор Қориев.
2020 йилнинг мартида Президент Администрацияси ҳузуридаги Иқтисодий тадқиқотлар ва ислоҳотлар маркази ЕОИИнинг Ўзбекистон фармсаноатига таъсирини баҳолаган эди. Хусусан, маҳаллий ишлаб чиқаришларга берилган имтиёзларнинг бекор қилиниши фармацевтика маҳсулотлари нархининг ошишига олиб келади, бироқ ўтиш даврига эришилса, имтиёзлар бекор қилинишини узайтириш имкониятидан фойдаланиш ва маҳаллий ишлаб чиқарувчилар 10 йил давомида 10-15 фоизли узилишларни қисқартириши мумкин.
Дори воситаларининг экспортида келинадиган бўлса, Иқтисодий тадқиқотлар ва ислоҳотлар маркази маълумотларига кўра, унинг ҳажми катта эмас ва асосий қисми (90 фоиздан ортиғи) учинчи давлатлар улушига тўғри келади. ЕОИИга қўшилиш нуқтаи назарига кўра, мавжуд экспорт ҳажми ўзгариши кутилмаяпти. Шу билан бирга, 220 та компаниядан 10 таси GMP махсус сертификатига эгалиги инобатга олинса (2020 йил охиридаги маълумотлар), маҳаллий ишлаб чиқарувчилар ўз маҳсулотларини ЕОИИ мамлакатларида сотиш имкониятига эга эмас, чунки иттифоқ шартларига кўра, 2026 йилда барча фармацевтика маҳсулотлари GMP стандарти бўйича сертификациядан ўтиши лозим.
Эслатиб ўтамиз, 2020 йил 11 декабрь куни бўлиб ўтган Евросиё иқтисодий иттифоқининг (ЕОИИ) видеоанжуман шаклидаги саммитида Ўзбекистон ва Кубага ташкилот ҳузуридаги кузатувчи давлат мақомини бериш тўғрисида қарор қабул қилинганди.
Изоҳ (0)