Курдистондан чиққан ҳамда дунё бўйлаб кезиб юргани айтилган табиб Али Маҳмуд Ҳасан Курдистоний Ўзбекистонга келгани ва Соғлиқни сақлаш вазирлиги фуқароларни сохта табиблардан эҳтиёт бўлишга чақиргани тўғрисида хабар берилганди. Кейинроқ Ички ишлар вазирлиги ҳам аҳолини «ассосиз маълумотлардан» огоҳлантирган. Миллий масс-медиани қўллаб-қувватлаш ва ривожлантириш жамоат фонди Васийлик кенгаши раиси Комил Алламжонов ҳам Тошкентга келган табибга ўз муносабатини билдирган.
Ўзбекистонга келган «курдистонлик табиб» Али Маҳмуд Ҳасан бўйича ИИВ ва Соғлиқни сақлаш вазирлиги фуқароларни огоҳлантирди.ИИВ миш-мишлардан келиб чиққан асоссиз маълумотларга ишонмасликни айтган бўлса, Соғлиқни сақлаш вазирлиги аҳолининг ишонч ва эътиқодидан фойдаланиб, сохта табиблик фаолияти билан шуғулланаётганлар ҳақида огоҳлантирди.
Агар унинг фирибгарлиги ҳақидаги маълумотлар асосли, исботланган бўлса, нега унинг фаолияти чекланмаяпти? Унинг бемалол вилоятма-вилоят юриб, одамларни даволашига йўл қўйиб бериляпти.
Агар ҳақиқатда фойдали табиб бўлса, уни ҳам рўйхатга олиш, лицензия деган қоидалари бор. Гап одамлар ишончи ва ҳаёти ҳақида кетяпти.
Энди бир камига четдан келиб, хоҳлаган одам, хоҳлаган ишини қилиб кетиши қолганди. Шаҳарнинг дарвозаси жойида турибдими ўзи? Албатта, кимдир ўлиши ёки азият чекиб, войдод, дейишини кутяпмизми?
Соғлиқни сақлаш вазирлиги, Санитария-эпидемиологик хизмат карантин, деб роса жазолашни биладику. Ёки матбуот ходимларининг озгина хатосини кўриб қолса, қонунлар ва жазоларни эслатувчи ИИВ қаерга қараяпти? Бу ҳолатда расмий муносабатнинг ўзи камлик қилади. Ишлаш керак, ўртоқлар, қуруқ гапиравермай!
PS: Шифо излаб ҳар бир имкониятдан фойдаланмоқчи бўлган барча беморларимизга эса Аллоҳ шифо берсин.
Комил Алламжонов, Миллий масс-медиани қўллаб-қувватлаш ва ривожлантириш жамоат фонди Васийлик кенгаши раиси
Изоҳ (0)