«Аждарлар» «аристократлар»га қарши. Барчаси «Порту» — «Челси» учрашуви ҳақида

Тошкент вақти билан 7 апрель тунида Европа Чемпионлар Лигаси чорак финали доирасида «Порту» — «Челси» учрашуви бўлиб ўтади.

Гарчи ушбу қарама-қаршилик чорак финалнинг энг кучсиз жуфтлиги дея таърифланаётган бўлса-да, интрига борасида «Бавария» — ПСЖ ўйинидан қолишмайди.

«Порту» гуруҳ босқичида иккинчи ўринни эгаллаганлар орасида чорак финалга етиб келган ягона жамоа бўлди. 1/8 финалда португаллар «Ювентус»ни доғда қолдирди. Икки ўйин натижасига кўра ўзаро тенглик (2:1, 1:2) юзага келганидан кейин белгиланган қўшимча бўлимларда Сержиу Оливейра ўзининг голи билан «Порту»ни кейинги босқичга олиб чиқди.

«Челси» ўтган босқичда муваффақиятсиз даврни бошдан кечираётган «Атлетико»га тўқнаш келди ва икки ўйин натижасига кўра 3:0 ҳисобини қайд этиб, шу босқичга етиб келди.

Португалия ва Буюк Британия ўртасидаги авиақатновлар ҳали тикланмагани боис ушбу жамоалар ўртасидаги ҳар икки ўйин ҳам Испаниянинг Севилья шаҳридаги «Рамон Санчес Писхуан» стадионида бўлиб ўтади.

Жамоалардаги ҳолат

«Порту»

Сержиу Оливейрасиз биринчи ўйин. Туриндаги ўйин Оливейра фаолиятидаги энг яхшиларидан бири бўлди — футболчи дубль қайд этишдан ташқари таянч ярим ҳимоясидаги ишларини ҳам қойилмақом бажарди. Бироқ Сержиу ўша ўйинда мусобақадаги учинчи сариқ карточкасини олди. Бу эса футболчининг кейинги ўйинни ўтказиб юборишини англатарди. Шунингдек, ушбу баҳсни «Ювентус»га қарши ўйинда қизил карточка олган Меҳди Тареми ҳам ўтказиб юборади.

Оливейранинг йўқлиги «аждарлар» учун катта муаммо бўлиши мумкин. У жамоанинг жорий мавсумдаги тўпурари бўлишдан ташқари, Пепе билан бирга ички муҳитга катта таъсир ўтказа оладиган етакчи ҳисобланади. Унинг ўрнига майдонга Марко Груич ёки ёш Фабиу Виейра тушиши кутилмоқда. Бироқ нима бўлган тақдирда ҳам улар Сержиунинг ўрнини боса олмайди.

Севилья шаҳри «Порту»га ёрдам берадими? «Аждарлар»нинг бу шаҳар билан боғлиқ ёрқин хотиралари бор — 2003 йилда айнан шу ерда жамоа УЕФА Кубогини қўлга киритганди. Кейинчалик жамоа бу ерга яна икки бор ташриф буюрган: 2011 йилда Европа Лигаси доирасидаги сафар ўйинида «Севилья»ни мағлуб этилган, 2014 йилда эса «Порту» испан клубига йирик ҳисобда ютқазган.

«Челси»

«Б вариант»нинг йўқлиги. Лондонликлар клуби Томас Тухель қўл остидаги ўйинлардаги муваффақиятга деярли бир хил сценарий орқали эришмоқда. Кўплаб ўйинлар битта режа бўйича ўтади: «Челси» тўп назоратини қўлга олади, бир-иккита гол уради ва кейин ҳимояни мустаҳкам ушлайди. Бу услуб орқали «кўклар» 14 ўйинда бор-йўғи иккита тўп ўтказиб юборди.

Ўтган уик-эндда жамоа «Вест Бромвич»га қарши ўйинда 1:0 ҳисобида олдинда бораётган вақтда Тиаго Сильванинг четлатилишидан кейин бир ўйинчи кам бўлиб қолди. Шу тариқа «Челси» биринчи марта сценарийдан четга чиқишга мажбур бўлди: ҳужум вақтида ҳимояда бўшлиқлар кўрина бошлади. Кейинчалик Лондон клуби ўз дарвозасидан бешта тўп олиб чиқди.

Жароҳатлар кун мавзуси ҳисобланмаса ҳам, жамоада кичик муаммолар йўқ эмас. Нголо Канте Франция терма жамоасида олган кичик жароҳати сабаб «Вест Бромвич»га қарши баҳсни ўтказиб юборди. Ўша ўйинда Матео Ковачич ва Жоржиньо тандеми майдон марказида у қадар яхши кўринмади. Шундай бўлса-да Канте «Челси» қайдномасидан ўрин олган, бундан ташқари, Тухель дам олиш кунларидаёқ ярим ҳимоячи ўзини яхши ҳис қилаётганини айтганди.

Аввалроқ Кристиан Пулишичда жароҳат борлиги ҳақида хабарлар тарқалганди, бироқ америкалик футболчи жамоанинг ўйин олди машғулотларида иштирок этган. Шунингдек, бир ярим ойдан буён жароҳатини тиклаш билан банд бўлган Тэмми Абраҳам ҳам қайдномага киритилган.

Тахминий таркиблар:

Статистика ва қизиқарли фактлар:

• Жамоалар шу вақтда қадар ўзаро саккиз бор тўқнаш келган. Уларнинг бештасида «Челси»нинг қўли баланд келган бўлса, иккита ўйинда «Порту» ютган, яна бир баҳсда дуранг қайд этилган;
• Бу икки жамоани Жозе Моуриньо боғлаб туради. Португалиялик мутахассис «Порту» билан мазкур мусобақа ғолибига ҳам айланганди;
• УЕФА клублар рейтингида «Порту» 15-ўринда бормоқда, «Челси» эса 13-поғонада.

 

Мураббийлар фикри

Сержиу Оливейранинг ўрнини билинтирмаслик қийин бўлади, аммо биз имкон топамиз. Олдимизда жуда қийин вазифа турганини биламан, бироқ уларга тайёрмиз.

Ўйин қуриш борасида бир нечта вариантларни кўриб чиқяпмиз. Ҳаётда иложи йўқ нарсанинг ўзи йўқ, айниқса футболда. «Челси» ўзининг сўнгги ўйинида ютқазиб қўйганидан афсусдаман. Баъзида бундай ҳолатлар жамоани тетиклаштириб юборади.

Сержиу Консейсау, «Порту» бош мураббийи

Бу Чемпионлар Лигаси чорак финали, у тўртта бўлимдан иборат. Эътиборни бутунлай ўйинга қаратиш керак. Терма жамоалар ўйинлари ва «Вест Бромвич»га қарши баҳсдаги натижадан кейин ўз ўйинимизни топишни истаймиз.

«Порту»ни ютиш қўлимиздан келишига ишонаман, бироқ ўйин жуда қийин бўлади. Бу жуда тажрибали жамоа, Португалиянинг кўп карра чемпиони. Бироқ биз етарли даражада кучлимиз ва ўзимизга ишонамиз. Кейинги босқичга чиқишга кучимиз етади.

Томас Тухель, «Челси» бош мураббийи

«Порту» — «Челси» учрашуви 00:00 да бошланади. Ўйиндаги голларни бу ерда томоша қилиб бориш мумкин — видео.