“Ajdarlar” “aristokratlar”ga qarshi. Barchasi “Portu” — “Chelsi” uchrashuvi haqida

Toshkent vaqti bilan 7-aprel tunida Yevropa Chempionlar Ligasi chorak finali doirasida “Portu” — “Chelsi” uchrashuvi bo‘lib o‘tadi.

Garchi ushbu qarama-qarshilik chorak finalning eng kuchsiz juftligi deya ta’riflanayotgan bo‘lsa-da, intriga borasida “Bavariya” — PSJ o‘yinidan qolishmaydi.

“Portu” guruh bosqichida ikkinchi o‘rinni egallaganlar orasida chorak finalga yetib kelgan yagona jamoa bo‘ldi. 1/8 finalda portugallar “Yuventus”ni dog‘da qoldirdi. Ikki o‘yin natijasiga ko‘ra o‘zaro tenglik (2:1, 1:2) yuzaga kelganidan keyin belgilangan qo‘shimcha bo‘limlarda Serjiu Oliveyra o‘zining goli bilan “Portu”ni keyingi bosqichga olib chiqdi.

“Chelsi” o‘tgan bosqichda muvaffaqiyatsiz davrni boshdan kechirayotgan “Atletiko”ga to‘qnash keldi va ikki o‘yin natijasiga ko‘ra 3:0 hisobini qayd etib, shu bosqichga yetib keldi.

Portugaliya va Buyuk Britaniya o‘rtasidagi aviaqatnovlar hali tiklanmagani bois ushbu jamoalar o‘rtasidagi har ikki o‘yin ham Ispaniyaning Sevilya shahridagi “Ramon Sanches Pisxuan” stadionida bo‘lib o‘tadi.

Jamoalardagi holat

“Portu”

Serjiu Oliveyrasiz birinchi o‘yin. Turindagi o‘yin Oliveyra faoliyatidagi eng yaxshilaridan biri bo‘ldi — futbolchi dubl qayd etishdan tashqari tayanch yarim himoyasidagi ishlarini ham qoyilmaqom bajardi. Biroq Serjiu o‘sha o‘yinda musobaqadagi uchinchi sariq kartochkasini oldi. Bu esa futbolchining keyingi o‘yinni o‘tkazib yuborishini anglatardi. Shuningdek, ushbu bahsni “Yuventus”ga qarshi o‘yinda qizil kartochka olgan Mehdi Taremi ham o‘tkazib yuboradi.

Oliveyraning yo‘qligi “ajdarlar” uchun katta muammo bo‘lishi mumkin. U jamoaning joriy mavsumdagi to‘purari bo‘lishdan tashqari, Pepe bilan birga ichki muhitga katta ta’sir o‘tkaza oladigan yetakchi hisoblanadi. Uning o‘rniga maydonga Marko Gruich yoki yosh Fabiu Viyeyra tushishi kutilmoqda. Biroq nima bo‘lgan taqdirda ham ular Serjiuning o‘rnini bosa olmaydi.

Sevilya shahri “Portu”ga yordam beradimi? “Ajdarlar”ning bu shahar bilan bog‘liq yorqin xotiralari bor — 2003-yilda aynan shu yerda jamoa UEFA Kubogini qo‘lga kiritgandi. Keyinchalik jamoa bu yerga yana ikki bor tashrif buyurgan: 2011-yilda Yevropa Ligasi doirasidagi safar o‘yinida “Sevilya”ni mag‘lub etilgan, 2014-yilda esa “Portu” ispan klubiga yirik hisobda yutqazgan.

“Chelsi”

“B variant”ning yo‘qligi. Londonliklar klubi Tomas Tuxel qo‘l ostidagi o‘yinlardagi muvaffaqiyatga deyarli bir xil ssenariy orqali erishmoqda. Ko‘plab o‘yinlar bitta reja bo‘yicha o‘tadi: “Chelsi” to‘p nazoratini qo‘lga oladi, bir-ikkita gol uradi va keyin himoyani mustahkam ushlaydi. Bu uslub orqali “ko‘klar” 14 o‘yinda bor-yo‘g‘i ikkita to‘p o‘tkazib yubordi.

O‘tgan uik-endda jamoa “Vest Bromvich”ga qarshi o‘yinda 1:0 hisobida oldinda borayotgan vaqtda Tiago Silvaning chetlatilishidan keyin bir o‘yinchi kam bo‘lib qoldi. Shu tariqa “Chelsi” birinchi marta ssenariydan chetga chiqishga majbur bo‘ldi: hujum vaqtida himoyada bo‘shliqlar ko‘rina boshladi. Keyinchalik London klubi o‘z darvozasidan beshta to‘p olib chiqdi.

Jarohatlar kun mavzusi hisoblanmasa ham, jamoada kichik muammolar yo‘q emas. Ngolo Kante Fransiya terma jamoasida olgan kichik jarohati sabab “Vest Bromvich”ga qarshi bahsni o‘tkazib yubordi. O‘sha o‘yinda Mateo Kovachich va Jorjinyo tandemi maydon markazida u qadar yaxshi ko‘rinmadi. Shunday bo‘lsa-da Kante “Chelsi” qaydnomasidan o‘rin olgan, bundan tashqari, Tuxel dam olish kunlaridayoq yarim himoyachi o‘zini yaxshi his qilayotganini aytgandi.

Avvalroq Kristian Pulishichda jarohat borligi haqida xabarlar tarqalgandi, biroq amerikalik futbolchi jamoaning o‘yin oldi mashg‘ulotlarida ishtirok etgan. Shuningdek, bir yarim oydan buyon jarohatini tiklash bilan band bo‘lgan Temmi Abraham ham qaydnomaga kiritilgan.

Taxminiy tarkiblar:

Statistika va qiziqarli faktlar:

• Jamoalar shu vaqtda qadar o‘zaro sakkiz bor to‘qnash kelgan. Ularning beshtasida “Chelsi”ning qo‘li baland kelgan bo‘lsa, ikkita o‘yinda “Portu” yutgan, yana bir bahsda durang qayd etilgan;
• Bu ikki jamoani Joze Mourinyo bog‘lab turadi. Portugaliyalik mutaxassis “Portu” bilan mazkur musobaqa g‘olibiga ham aylangandi;
• UEFA klublar reytingida “Portu” 15-o‘rinda bormoqda, “Chelsi” esa 13-pog‘onada.

 

Murabbiylar fikri

Serjiu Oliveyraning o‘rnini bilintirmaslik qiyin bo‘ladi, ammo biz imkon topamiz. Oldimizda juda qiyin vazifa turganini bilaman, biroq ularga tayyormiz.

O‘yin qurish borasida bir nechta variantlarni ko‘rib chiqyapmiz. Hayotda iloji yo‘q narsaning o‘zi yo‘q, ayniqsa futbolda. “Chelsi” o‘zining so‘nggi o‘yinida yutqazib qo‘yganidan afsusdaman. Ba’zida bunday holatlar jamoani tetiklashtirib yuboradi.

Serjiu Konseysau, “Portu” bosh murabbiyi

Bu Chempionlar Ligasi chorak finali, u to‘rtta bo‘limdan iborat. E’tiborni butunlay o‘yinga qaratish kerak. Terma jamoalar o‘yinlari va “Vest Bromvich”ga qarshi bahsdagi natijadan keyin o‘z o‘yinimizni topishni istaymiz.

“Portu”ni yutish qo‘limizdan kelishiga ishonaman, biroq o‘yin juda qiyin bo‘ladi. Bu juda tajribali jamoa, Portugaliyaning ko‘p karra chempioni. Biroq biz yetarli darajada kuchlimiz va o‘zimizga ishonamiz. Keyingi bosqichga chiqishga kuchimiz yetadi.

Tomas Tuxel, “Chelsi” bosh murabbiyi

“Portu” — “Chelsi” uchrashuvi 00:00 da boshlanadi. O‘yindagi gollarni bu yerda tomosha qilib borish mumkin — video.