Туркманистонда бир марталик мукофот пуллари ва ойлик пул маблағлари беришни кўзда тутувчи халқ итбоқари ва хизмат кўрсатган итбоқар унвонлари таъсис этилди. Бу ҳақда «Интерфакс» хабар берди.
Президент Гурбангули Бердимуҳамедовнинг тегишли қонунларини нашр этувчи «Нейтралний Туркменистан» газетасининг хабар беришича, халқ итбоқари унвонига сазовор бўлганларга энг кам иш ҳақининг беш баравари миқдорида бир марталик мукофот ва ойлик, пенсия, нафақа ва стипендияларига энг кам иш ҳақининг 30 фоизи миқдорида ойлик устама қўшилади.
Хизмат кўрсатган итбоқар унвонини олганларга эса энг кам иш ҳақининг тўрт баравари миқдорида бир марталик мукофот ва ҳар ой энг кам ойлик иш ҳақининг 20 фоизи миқдорида устама берилади.
Туркманистон халқ итбоқари унвони «Туркманистон мустақиллиги йилларида халқнинг миллий қадриятларидан бири бўлган туркман алабайларининг дунё миқёсидаги обрўсини оширишга катта ҳисса қўшган» шахслар учун берилади.
Туркманистонда хизмат кўрсатган итбоқар унвони «туркман халқининг энг бой маданий меросининг ажралмас қисми бўлган туркман алабайларини боқиш ва наслини кўпайтиришда катта хизмат қилган» шахсларга тақдим этилади.
Ушбу мукофотлар Туркманистон фуқароларига, шунингдек, чет элликларга ҳам берилиши мумкин.
Аввалроқ Гурбангули Бердимуҳамедов Ахалтекин от мажмуасига ташриф буюргани ҳақида хабар берилди. Мажмуада давлат раҳбарига парвариши билан ўзи шуғулланган Акхан отидан биринчи тойчоқ туғилгани ҳақида «хушхабар» етказилди.
Шунингдек, Туркманистон президенти Гурбангули Бердимуҳамедов 25 январь куни Ашхободда қурилаётган йирик объектларни кўздан кечириш вақтида «Туркман алабай итлари» халқаро ассоциацияси буюртмаси билан кучуклар учун қурилаётган махсус бошпаналарни ҳам кўздан кечирди. Ташрифи якунида Туркманистон раҳбари туркман алабайи байрами ва туркман оти миллий байрамини (Туркманистонда апрель ойининг охирги якшанбасида нишонланади) бирлаштиришни таклиф қилди.
Маълумот учун:
Изоҳ (0)