Жамоат транспорти ҳайдовчилари тушум режасидан озод қилиниб, уларга босиб ўтган ҳар бир километрига қараб пул тўланади. Бу ҳақда компаниянинг лойиҳалари, ташқи алоқалар ва инвестициялар бўлими бошлиғи Шаҳбоз Ғофуровга асосланиб «Podrobno.uz» хабар қилди.
«Ҳа, айрим ҳайдовчиларнинг антеннани ўчириб қўйиши ёки ўрнатилган GPS-трекернинг модификасиясини ўзгартириши каби ҳолатлар учраб туради. Бунинг сабабларидан бири тушум режасидир. Яъни ҳайдовчилар тушум режасини бажариш учун айрим ҳолларда қоидага зид тарзда иш тутади», — деб таъкидлаган у.
Шаҳбоз Ғофуровнинг сўзларига кўра, ушбу йўналишда лойиҳа ишлаб чиқилган бўлиб, унга кўра, келажакда ҳайдовчилар хизмати учун улар босиб ўтган километрга қараб ҳақ тўлаш амалга оширилади. Яъни ҳайдовчилар йўлкира учун пул йиғишдан озод қилинади. Улар фақат рейслар ҳаракати жадвали ва интервалига риоя қилишлари лозим бўлади.
Бундан ташқари, автобусларнинг, айниқса кечқурун жадвалга мувофиқ ҳаракатланишини бевосита назорат қиладиган диспетчерлик маркази фаолияти такомиллаштирилади.
Изоҳ (0)