Самарқанд шаҳрида 2 апрель куни институт ўқитувчиси 21 ёшли қиздан шахсий фотосуратларни тарқатиб юбормаслик учун 400 доллар талаб қилди. Бу ҳақда Тергов департаменти хабар берди.
Маълум қилинишича, 2 апрель куни Самарқанд шаҳри бўйича ички ишлар органлари фаолиятини мувофиқлаштириш бўлимига 21 ёшли С.А. ариза билан мурожаат қилиб, бу ҳақда маълум қилган. Унда унга тегишли сир сақланиши лозим бўлган фотосуратларини обрўли институтлардан бирида ўқитувчи бўлиб ишловчи таниши 27 ёшли В.Ф. ижтимоий тармоқларда тарқатиб юбормаслик эвазига 400 АҚШ доллари талаб қилаётганини билдирган.
Шу куни соат 13:00 да Самарқанд шаҳри «Қўшҳовуз» маҳалласи ҳудудида В.Ф. 400 долларни С.А.дан товламачилик йўли билан олган вақтида ашёвий далиллар билан ушланган.
Мазкур ҳолат юзасидан Самарқанд шаҳри бўйича ИИО ФМБ ҳузуридаги тергов бўлими томонидан В.Ф.га нисбатан Жиноят кодексининг 165-моддаси 1-қисми (товламачилик) билан жиноят иши қўзғатилиб, гумон қилинувчи тариқасида жалб қилинган. Ҳозирда тергов ҳаракатлари олиб борилмоқда.
Бундан аввал наманганлик эркак билан Telegram’да ёлғондан ишқий муносабатга киришиб, сўнгра ушбу ёзишмаларни тарқатмаслик эвазига ундан 1000 доллар сўраган аёл ушлангани, бекободлик аёлнинг эски Telegram аккаунтидаги шахсий расмларини интернетда тарқатиб юбормаслик учун ундан 5 миллион сўм сўраган 15 ёшли қиз ушлангани ҳамда Хоразмда аёлнинг шахсий видеотасвирларини қариндошларига кўрсатиш билан қўрқитиб, ундан 1,5 минг доллар ва телефон талаб қилган йигит ушлангани ҳақида хабар берилганди.
Изоҳ (0)