Бухоро вилоятининг Ғиждувон туманида алимент тўлашдан бўйин товлаб, қамалган фуқаро М.К. яшириб қўйган Cobalt’и топилгач, 19 миллион 520 минг сўм қарзини тўлаб берди. Бу ҳақда «Дарё»га МИБ Ғиждувон тумани бўлими бошлиғи Лазиз Қаҳҳоров хабар берди.
Таъкидланишича, фуқаро М.К. фарзанди учун 16 ой давомида 19 миллион 520 минг сўм миқдоридаги алимент қарздорлигини тўлашдан қасддан бўйин товлаб келган. Мажбурий ижро бюроси Ғиждувон тумани бўлими давлат ижрочиси томонидан бир неча маротаба фарзандларининг моддий таъминотини бажариши юзасидан огоҳлантирилган бўлса-да, у қарзини тўламаган. Шундан сўнг Жиноят ишлари бўйича Ғиждувон туман судининг очиқ суд мажлисида унга нисбатан Маъмурий ҳуқуқбузарлик қўлланилган. Ва суд ҳукмига кўра, 15 суткага маъмурий қамоқ жазоси тайинланган.
«Бироқ фуқаронинг ўн беш суткага қамоққа олингани унинг келгусида алиментдан келиб чиққан қарздорлигини тўлашдан озод қилмайди. Ҳар бир ота турли можаро ва келишмовчиликлар сабабли оиласидан ажралган бўлса ҳам ўз фарзанди келажаги учун масъул ва моддий жавобгар ҳисобланади», — деди Лазиз Қаҳҳоров.
МИБ томонидан фуқаро М.К. номида Cobalt борлиги аниқлангач, унинг яшириб келган автомашинасига қидирув эълон қилинган. Қидирув натижасида автоулов топилган ва жарима майдончасига жойлаштирилган. Ҳолат юзасидан М.К.га яна маъмурий баённома расмийлаштирилган.
Машинаси олиб қўйилгач, 16 ой давомида алимент тўловларини тўлашдан қасддан бўйин товлаб келаётган фуқаро 19 миллион 520 минг сўм миқдоридаги алимент пулларини тўлаб берган.
Изоҳ (0)