Бангладешнинг Шиталакшья дарёсида 50 нафар йўловчини олиб кетаётган паром (солсимон ясси кема) юк ташувчи кема билан тўқнашди ва чўкиб кетди. Бу ҳақда маҳаллий ОАВга таяниб, «Интерфакс» хабар берди.
Ҳалокат натижасида энг камида беш киши қурбон бўлди ва кўпчилик бедарак йўқолди.
Полиция вакили Кабир Хуссайннинг маълумот беришича, Нараянганж шаҳридан чиққан паром Мунишиганж округига йўл олган.
«Бедарак йўқолганларни қидириш давом этмоқда», — деди у ва баъзи йўловчилар қирғоққача сузиб келишга муваффақ бўлганини қўшимча қилди.
Таъкидланишича, паромда меъёридан ортиқ йўловчи бўлган. Ҳукумат 5 апрелдан бошлаб мамлакатда COVID-19’га чалиниш ҳолатларининг кўпайиши сабабли бир ҳафталик карантин жорий қилгани учун одамлар уйларига қайтишга шошилган.
Аввалроқ Россиянинг Ленинград вилояти, Отрадной шаҳридаги «Пелла» кемасозлик заводида қурилаётган «Скорпион» траулери (балиқ овлаш кемаси) синовлар пайтида ағдарилиб кетгани ҳақида хабар берилди. Ленинград вилояти ҳукуматининг хабар беришича, ҳодиса содир бўлган пайтда траулер бортида 80 киши бўлган, 78 нафар ишчи «зудлик билан эвакуация қилинган». Шунингдек, ҳодиса оқибатида траулернинг бир эркак ва бир аёл ходими ҳалок бўлгани ҳақида хабар қилинди.
Ўрта Ер денгизининг Тунис қирғоқлари яқинида эса ичида ноқонуний кўчаётган муҳожирлар бўлган иккита қайиқ ағдарилиб, чўкиб кетди. Қайиқлар Италиянинг Лампедуза ороли томон кетаётган эди. Ҳалокат оқибатида камида 39 киши ҳалок бўлган. Ҳалок бўлганлар орасида аёллар ва болалар ҳам бор. Уларнинг барчаси Африка мамлакатлари фуқаролари бўлган.
Шунингдек, Россия Федерацияси байроғи остидаги «Арвин» қуруқ юк ташувчи кемаси Қора денгизда Туркиянинг Бартин вилояти соҳиллари яқинида чўкиб кетгани ҳақида маълумот берилган эди. Бортда жами 13 нафар экипаж аъзоси бўлгани, уларнинг барчаси россиялик экани маълум бўлди. Уларнинг беш нафари қутқарилган. Камида икки киши ҳалок бўлган. Кейинроқ қутқариб олинган Россия фуқароси Николай Кринов фожиа ёмон об-ҳаво шароити туфайли юз берган бўлиши мумкинлигини айтди.
Изоҳ (0)