Bangladeshning Shitalakshya daryosida 50 nafar yo‘lovchini olib ketayotgan parom (solsimon yassi kema) yuk tashuvchi kema bilan to‘qnashdi va cho‘kib ketdi. Bu haqda mahalliy OAVga tayanib, “Interfaks” xabar berdi.
Halokat natijasida eng kamida besh kishi qurbon bo‘ldi va ko‘pchilik bedarak yo‘qoldi.
Politsiya vakili Kabir Xussaynning ma’lumot berishicha, Narayanganj shahridan chiqqan parom Munishiganj okrugiga yo‘l olgan.
“Bedarak yo‘qolganlarni qidirish davom etmoqda”, — dedi u va ba’zi yo‘lovchilar qirg‘oqqacha suzib kelishga muvaffaq bo‘lganini qo‘shimcha qildi.
Ta’kidlanishicha, paromda me’yoridan ortiq yo‘lovchi bo‘lgan. Hukumat 5-apreldan boshlab mamlakatda COVID-19’ga chalinish holatlarining ko‘payishi sababli bir haftalik karantin joriy qilgani uchun odamlar uylariga qaytishga shoshilgan.
Avvalroq Rossiyaning Leningrad viloyati, Otradnoy shahridagi “Pella” kemasozlik zavodida qurilayotgan “Scorpion” trauleri (baliq ovlash kemasi) sinovlar paytida ag‘darilib ketgani haqida xabar berildi. Leningrad viloyati hukumatining xabar berishicha, hodisa sodir bo‘lgan paytda trauler bortida 80 kishi bo‘lgan, 78 nafar ishchi “zudlik bilan evakuatsiya qilingan”. Shuningdek, hodisa oqibatida traulerning bir erkak va bir ayol xodimi halok bo‘lgani haqida xabar qilindi.
O‘rta Yer dengizining Tunis qirg‘oqlari yaqinida esa ichida noqonuniy ko‘chayotgan muhojirlar bo‘lgan ikkita qayiq ag‘darilib, cho‘kib ketdi. Qayiqlar Italiyaning Lampeduza oroli tomon ketayotgan edi. Halokat oqibatida kamida 39 kishi halok bo‘lgan. Halok bo‘lganlar orasida ayollar va bolalar ham bor. Ularning barchasi Afrika mamlakatlari fuqarolari bo‘lgan.
Shuningdek, Rossiya Federatsiyasi bayrog‘i ostidagi “Arvin” quruq yuk tashuvchi kemasi Qora dengizda Turkiyaning Bartin viloyati sohillari yaqinida cho‘kib ketgani haqida ma’lumot berilgan edi. Bortda jami 13 nafar ekipaj a’zosi bo‘lgani, ularning barchasi rossiyalik ekani ma’lum bo‘ldi. Ularning besh nafari qutqarilgan. Kamida ikki kishi halok bo‘lgan.Keyinroq qutqarib olingan Rossiya fuqarosi Nikolay Krinov fojia yomon ob-havo sharoiti tufayli yuz bergan bo‘lishi mumkinligini aytdi.
Izoh (0)