Boeing компаниясига тегишли СSТ-100 Starliner космик кемасининг май ойига режалаштирилган Халқаро космик станцияга (ХКС) иккинчи учувчисиз синов парвози июль ойининг охирига қолдирилди. Бу ҳақда Spaceflight Now махсус сайтига таяниб, «Интерфакс» хабар берди.
Америкалик космонавтларининг келажакдаги коинот парвозлари учун яратилган кеманинг ишга туширилиши Флорида штатининг Канаверал бурнида жойлашган космодромнинг 41-учириш мажмуасидан, United Launch Alliance компаниясига тегишли Atlas 5 ташувчи ракетаси ёрдамида амалга оширилиши кутилмоқда.
Starliner’нинг 2019 йил 20 декабрда амалга оширилган биринчи синов парвозидан сўнг (ўшанда космик кема ХКСга туташа олмаган эди), уни учувчисиз режимда ХКСга қайта учириш тўғрисида қарор қабул қилинди.
Ракета учувчисиз кемани суборбитал траекторияга муваффақиятли олиб чиққан. Лекин шундан кейин двигателнинг ишлаш вақтини белгилаш тизимида носозлик юзага келган, натижада Starliner кемаси ХКС билан яқинлашиш учун режалаштирилмаган, анча пастроқ орбитага кирган.
Космик кема Нью-Мексико штатидаги Уайт-Сендс полигонига муваффақиятли қўнишни амалга оширган. Бу Америка космик капсулаларининг биринчи маротаба ерга қўниши эди. Бундан олдинги барча қурилмалар океанга тушган.
NASA февраль ойи бошида Boeing компаниясининг Америкадаги энг янги Starliner космик кемасининг астронавтлар билан ХКСга биринчи парвозини сентябрь ойидан олдинга режалаштирмаётганини маълум қилган эди.
NASA билан шартномалар доирасида Boeing компанияси астронавтларни ХКСга етказиш ва уларни Ерга қайтариш учун Starliner миссияларини ташкиллаштириш ва амалга ошириш бўйича ишланмаси учун 5 миллиард доллар олди. Бу космик кема етти киши учун мўлжалланган.Американинг бошқа компанияси — SpaceX ўзининг Crеw Dragon космик кемасини яратиш учун NASA билан шу каби шартнома доирасида 3,1 миллиард доллар олди. Ушбу космик кема 2020 йилнинг ноябрь ойида ХКСга астронавтлар билан парвозни амалга оширди ва станцияга тўртта астронавтни етказиб берди.
Изоҳ (0)