Президент фармойишига биноан Андижон ва Навоий вилоятлари давлат солиқ бошқармаларига янги бошлиқлар тайинланди. Бу ҳақда Давлат солиқ қўмитаси матбуот хизмати хабар берди.
Андижон вилояти давлат солиқ бошқармаси бошлиғи этиб Равшанжон Насимов тайинланди. Тайинловга қадар Навоий вилояти Давлат солиқ бошқармаси бошлиғи лавозимида ишлаб келган.
Равшанжон Насимов 1971 йилда Самарқанд вилоятида туғилган. 1993 йилда Тошкент молия институтини «иқтисодчи» мутахассислиги бўйича тамомлаган.
Навоий вилояти давлат солиқ бошқармаси бошлиғи лавозимига эса Анваржон Ботиралиев тайинланган. Тайинловга қадар у Фарғона вилояти давлат солиқ бошқармаси бошлиғи ўринбосари вазифасида ишлаб келган.
Анваржон Ботиралиев 2001 йилда Фарғона давлат университетини «иқтисодиёт» мутахассислиги, 2004 йилда Банк-молия академиясини «Солиқлар ва солиққа тортиш» мутахассислиги бўйича тамомлаган.
Равшанжон Насимов ҳам, Анваржон Ботиралиев ҳам солиқ хизматининг I даражали маслаҳатчиси ҳисобланади.
Аввалроқ Капитал бозорини ривожлантириш агентлиги директори лавозимида ишлаб келаётган Отабек Назиров тўғридан-тўғри инвестициялар жамғармаси бош директори этиб тайинлангани ҳақида хабар берилган эди. Шунингдек, Монополияга қарши курашиш қўмитасига янги раис, Ўзбекистон транспорт вазири ва Ўзбекистон қурилиш вазирига янги ўринбосар тайинлангани ҳақида хабар берилган эди.
Изоҳ (0)