Пахтачида сел бузиб юборган «яп-янги қурилган» кўприк аслида 50 йиллик эски кўприк экани маълум қилинди

Самарқанд вилоятида 28 март куни кузатилган кучли ёғингарчилик оқибатида Пахтачи туманидаги Болтали—Боғолони—Зиёвуддин йўлининг 12—13-километрлари оралиғидаги зовур кўприги катта талафот кўргани ҳақида хабар берилган эди. Интернет-фойдаланувчилар ёмғир ва сел оқибатида жиддий зарар кўрган ушбу кўприк «яп-янги қурилган ва асфальт қилинган»ини айтганди.

ЎзАнинг маълум қилишича, мактаб ўқувчилари пиёдалар, транспортлар мунтазам қатнайдиган Пахтачи туманидаги «Миркан» ва «Дарға» маҳаллалари орасидаги (узунлиги 8,6 метр) ушбу кўприк ижтимоий тармоқларда тарқалганидек, 2020 йилнинг ноябрида эмас, 1971 йилда фойдаланишга топширилган.

Жала ёғиши натижасида пайдо бўлган кучли сув оқими Болтали—Боғолони—Зиёвуддин автомобиль йўлининг 14-километридаги зовур устидан ўтувчи кўприк қирғоқларини емириб, айнан ана шу эски кўприкни чўктириб юборган.

Қайд этилишича, Пахтачи тумани ҳокими Музафар Ҳамдамов бошчилигидаги бир гуруҳ мутасаддилар зудлик билан ҳодиса жойига етиб бориб, ҳолатни ўрганган. Шунингдек, аҳоли эҳтиёжидан келиб чиққан ҳолда вақтинчалик зовур бўйлаб пиёдалар ва автомобиллар йўлагини тайёрлаш ишлари йўлга қўйилди.

Иш суръатини тезлаштириш мақсадида туман Йўллардан фойдаланиш унитар корхонаси ва Ободонлаштириш бошқармаси жалб этилган.

«Биринчи галда мактаб ўқувчиларининг ўқув машғулотларига хавфсиз қатновини тиклашимиз керак эди. Бундан ташқари транспортлар учун ҳам нимадир қилмасак бўлмасди. 50 йиллик эски кўприкни кенгайтириб, қайтадан қуришимизга тўғри келади ва бунга кучимиз ҳам етади. Аммо озгина вақт керак», — деган Ҳамдамов.

Хабарда айтилишича, туман ҳокимлиги ва мутасаддилар саъй-ҳаракати билан 1 апрелдан бошлаб Болтали—Боғолони—Зиёвуддин йўналиши бўйлаб транспортлар қатнови тўлиқ йўлга қўйилди. Шунингдек, аввалгига қараганда мустаҳкам ва замонавий янги кўприкни қуриш бўйича ҳам лойиҳалар ўрганилиши бошлаб юборилди.