Шавкат Мирзиёев Туркий тилли давлатлар ҳамкорлик кенгашининг видеоконференция шаклида ўтказилган норасмий саммитида Тоғли Қорабоғ масаласига тўхталиб ўтди, деб хабар беради Президент матбуот хизмати.
«Бугунги фурсатдан фойдаланиб, Озарбайжон президенти ҳурматли Илҳом Алиев ва Озарбайжон халқини Тоғли Қорабоғ ҳудудини қайтариб, тарихий адолатни тиклаш йўлидаги ғалабаси билан яна бир бор табриклайман», — дея таъкидлаган Президент.
Президент Ўзбекистон Тоғли Қорабоғ заминидаги кўҳна обидалар, маданият ва маърифат масканларини тиклаш ишларига ҳисса қўшишга тайёр эканини билдирган.
Эслатиб ўтамиз, Тоғли Қорабоғда Озарбайжон ва Арманистон ўртасидаги жанговар ҳаракатлар 27 сентябрь куни қайта бошланганди. Иккала давлат ҳам ҳарбий ҳолат жорий қилди ва бир-бирини тинч аҳолига қарши ҳужумларда айблади. Қурбонлар ҳам ҳарбий хизматчилар, ҳам оддий одамлар бўлди. 9 октябрда Москвада зиддиятли томонларнинг вакиллари билан музокаралар олиб борилди, натижада жанговар ҳаракатларни тўхтатиш тўғрисида қарор қабул қилинди. Ўт очишни тўхтатиш 10 октябрь куни эрталаб кучга кирди.
Илҳом Алиев, Арманистон бош вазири Никол Пашинян ва Россия президенти Владимир Путин ўртасида 10 ноябрда имзоланган келишувга мувофиқ, Озарбайжон ҳарбий ҳаракатлар пайтида босиб олинган ҳудудни ҳам, 1990 йилларнинг бошларида қўлдан чиқарилган Лачин, Агдам ва Келбажар туманларидаги аҳоли пунктларини ҳам олади. Шу жумладан, стратегик жиҳатдан муҳим Шуша шаҳри Озарбайжонга ўтди.
Изоҳ (0)