Отабек Назиров инвестициялар ва ташқи савдо вазирининг маслаҳатчиси – Ўзбекистоннинг тўғридан-тўғри инвестициялар жамғармаси бош директори этиб тайинланди. Бу ҳақда вазирлик матбуот хизмати хабар берди.
У 2019 йилнинг январь ойидан буён Капитал бозорини ривожлантириш агентлиги директори лавозимида ишлаб келаётган эди.
Отабек Назиров 1975 йилда Тошкентда туғилган, 1998 йилда макроиқтисодиёт ихтисослиги бўйича АҚШдаги Нью-Йорк давлат университетини тамомлаган. У АҚШдаги Goldman Sachs ва JPMorgan Chase, Россиядаги «Тройка Диалог» ва МДМ Банк каби йирик молиявий ва инвестиция компанияларида, шунингдек, Европа тикланиш ва тараққиёт банкида ишлаган.
У Ўзбекистонда ўз фаолиятини 2018 йилда инновацион ривожланиш вазирининг ўринбосари лавозимида бошлаган, кейинчалик халқ таълими вазирининг ўринбосари сифатида фаолият юритган.
Ўзбекистоннинг тўғридан-тўғри инвестициялар жамғармаси рақобатбардош маҳаллий компанияларга инвестициялар киритиш, шунингдек, хусусий маҳаллий ва хорижий инвесторлар билан узоқ муддатли ўзаро фойдали шериклик муносабатларини йўлга қўйиш мақсадида ташкил этилган.
Жамғарманинг асосчиси Тикланиш ва тараққиёт жамғармаси ҳисобланади, фаолияти эса Инвестициялар ва ташқи савдо вазирлиги томонидан мувофиқлаштирилади.
Аввалроқ Монополияга қарши курашиш қўмитасига янги раис, Ўзбекистон транспорт вазири ва Ўзбекистон қурилиш вазирига янги ўринбосар тайинлангани ҳақида хабар берилган эди.
Изоҳ (0)