31 март куни Термиз халқаро савдо маркази объектларини лойиҳалаш, қуриш ва сотишни ташкил этиш бўйича танловга талабгорлардан келиб тушган таклифлар кўриб чиқилди, деб хабар беради вилоят ҳокимлиги матбуот хизмати. Президент фармонига кўра, ушбу объект учун Ўзбекистон тикланиш ва тараққиёт жамғармасидан 20 миллион доллар имтиёзли кредит ажратилади.
Маълум қилинишича, учта компания ушбу лойиҳада иштирок этиш ниятини билдирган: Beijing Xinshiyuan Technology Development Co.Ltd, «Сурхон саноат-таъминот» МЧЖ ҳамда «Фабулло Строй Сервис» МЧЖ.
Танловда «Сурхон саноат-таъминот» МЧЖ танлов ғолиби деб топилган. Мазкур компания Термиз халқаро аэропорти, Сурхондарё вилоят давлат архиви биноси, Термиз туманида 100 ўринли махсус шифохона ва 1000 ўринга мўлжалланган беморларни вақтинчалик сақлаш объектларини қурган.
Telegram’даги «Davletovuz» канали муаллифининг аниқлик киритишича, қарийб 33 миллиард сўмлик 100 ўринли махсус шифохона ва 1000 ўринли вақтинчалик карантинда сақлаш мажмуасини «Термиз-таъминот саноат қурилиш таъминоти» хусусий корхонаси қурган. Маблағ Инқирозга қарши курашиш жамғармасидан ажратилган. Ушбу корхона «Сурхон саноат-таъминот» компанияси гуруҳига киради.
Таъкидланишича, танловда иштирок этган учинчи компания — «Фабулло Строй Сервис» МЧЖ ҳам очиқ маълумотларга кўра, «Сурхон саноат-таъминот» қурилиш компаниялари гуруҳига киради. «Фабулло Строй Сервис» МЧЖ таъсисчиларидан бири ҳамда раҳбари Қодиров Улуғбек Тўхтаевич, «Сурхон саноат-таъминот» компаниясининг бош директори Қодиров Баҳодир Тўхтаевич.
Лойиҳа доирасидаги қурилиш ишлари 2022 йилнинг 2-чорагида якунланиши режалаштирилган.
Аввалроқ Коррупцияга қарши курашиш агентлиги Навоий ва Андижондаги тендерларга оид ҳуқуқбузарликлар бўйича ҳисоботни эълон қилгани, Сенатнинг ўн учинчи ялпи мажлисида «Давлат харидлари тўғрисида»ги қонун маъқуллангани тўғрисида хабар берилганди.
Изоҳ (0)