Apple мустақил сервис марказлари дастурини (IRP) яна 200 дан ортиқ мамлакатга, жумладан, Ўзбекистонга ҳам кенгайтирмоқда. Бу ҳақда компания сайтига таяниб, Spot хабар берди.
IRP доирасида компаниялар эҳтиёт қисмларни Apple’нинг ваколатли хизмат кўрсатиш марказлари билан бир хил нархда олиши мумкин. Шунингдек, корпорация асбоб-ускуналар, қўлланмалар, диагностика ва бепул ўқитиш билан таъминлайди.
Дастур босқичма-босқич кенгайтирилади — Ўзбекистон иккинчи тўлқиндан ўрин олган, сервис марказлар йил охирларида IRP сифатида рўйхатдан ўтказиш бўйича ариза бериши мумкин.
Мустақил сервис марказлар дастури 2019 йили АҚШда ишга туширилган бўлиб, ҳозирда ундан АҚШ, Канада ва Европадаги 1500 та таъмирлаш марказлари фойдаланмоқда. Apple дастурни «компания маҳсулотлари сотиладиган деярли барча мамлакатларга» кенгайтиришни режа қилган.
Дастур шартлари ошкор этилмаган. Виcе маълумотларига кўра, иштирокчилар Apple томонидан амалга ошириладиган кутилмаган текширувларга рози бўлиши керак. Агарда марказни текшириш вақтида оригинал бўлмаган эҳтиёт қисмлар топилса, Apple жарима белгилаши мумкин.
Эслатиб ўтамиз, 2021 йилнинг январь ойида Ахборот технологиялари ва коммуникацияларини ривожлантириш вазирлиги ахборот хизмати раҳбари Шерзод Аҳматов Ўзбекистонда Apple компаниясининг расмий офислари очилишини маълум қилганди.
Изоҳ (0)