Кун давомида тик туриш ва юриш ҳисобига оёқлар зўриқади. Чиройли аммо ноқулай пойабзал эса муаммони янада жиддийлаштиради. Оғриқнинг такрорланиши эса шунчаки ўтиб кетмаслиги, бутун тана, шунингдек, мия фаолиятига ҳам таъсир қилиши мумкин. Вақтида эътибор берилмаслик эса жиддий оқибатларга олиб келади.
Нима учун оёқ кафтининг саломатлигига бефарқ бўлмаслик керак?
Оёқ кафти одамнинг оғирлигини кўтаради, гавдани мувозанатда бўлишини таъминлайди ва организмни турли жароҳатланишлардан сақлайди. Баланд пошнали ёки аксинча таг қисми ҳаддан ортиқ текис ва учли бўлган пойабзалларда юриш ҳамда ҳаракатланиш қийинчилик келтириб чиқаради. Нотўғри зўриқиш ҳисобига оёқда муаммолар пайдо бўлиши, ўз вақтида зарур чоралар кўрилмаса, кучли деформацияга олиб келиши мумкин.
Ясси оёқлик энг кўп тарқалган патологиялардан бири ҳисобланади.
Юришда тана оғирлигининг оёқларга нотўғри тақсимланиши қуйидаги оқибатларга олиб келади:
- оёқ бўғимлари деформацияси;
- белда оғриқ;
- варикоз;
- умуртқа поғонасининг қийшайиши.
Қандай оёқ кийимлардан воз кечган яхши?
Травматолог-ортопедлар зўриқишни 5-6 карра кўпайтиргани сабаб ҳам баланд пошнали оёқ кийим кийишни тавсия қилмайди. Келтириб чиқарадиган оғриқ ва ноқулайликлар ясси оёқликнинг ривожланишига таъсир қилади. Тасаввур қилинг: ҳар гал қадам босганда зарбли тўлқин оёқ учидан умуртқа поғонасининг бўйин қисмигача тарқалади. Унинг кучини ҳисоблаш осон: вазннинг учдан икки қисми кун давомида ташланган қадамлар сонига кўпайтирилади. Одатда 2-3 фоиз зўриқиш бош мияда кузатилади.
Пошнали туфли сабаб оёқнинг товон қисми одатдагидан бошқачароқ ҳаракатланади ва зўриқади. Бунда ҳар қадамда мияга кўпроқ зарб бўлади ва табиийки бошда оғриқ пайдо бўлади. Тиззаларга оғирлик тушади ва артроз келиб чиқиш хавфи юқори бўлади. Нотўғри оёқ кийимдан фойдаланганда умуртқа поғонасининг пастки қисмида сурункали оғриқ пайдо бўлади.
Мутахассислар угги ва балетка кийишни ҳам тавсия қилмайди. Ингичка тагчармдан тикилган пойабзалда ҳаракатланганда товонга қўшимча ёрдам бўлмайди. Тўғри ҳимоя бўлмагани ҳисобига оёқ, тос, бел мушаклари зўриқади, оқибатда ясси оёқлик, суяклар артрози, яллиғланиш ва умуртқа поғонасидаги оғриқлар ривожланади.
Образни ўзига хос кўрсатгани билан учли туфлилар ҳам саломатлик учун зарарли ҳисобланади. Гап шундаки, ортиқча зўриқиш сабаб оёқ кафти бармоқларидаги қон айланиши ёмонлашади. Шу сабаб ҳам оёқ кийимни тўғри ўлчамдагисини танлаш керак. Куннинг иккинчи ярмида оёқлар шишгани сабаб ҳам пойабзални кечқурун кийиб кўриб, харид қилиш тавсия қилинади.
Симптомлар намоён бўлганда нима қилиш керак?
Ноқулайлик, оғирлик ва оғриқ оёқлар зўриқаётганидан дарак берувчи аломат саналади. Улар пайдо бўлганда аввало гардеробдаги пойабзалларни кўздан кечириш керак. Ортопедлар 2-4 см баландликдаги, олд қисми кенг ҳамда боғичли моделларни танлашни маслаҳат беради. Шунингдек, оёқ кафтини анатомик тўғри ҳолатда бўлишини таъминловчи, оғриқ ва чарчоқни камайтирувчи ортопедик патаклар ҳам яхши самара беради. Ҳар бир одамнинг оёқ кафтидан келиб чиқиб ясалган индивидуал патаклар эса янада яхши самара беради.
Вақтида эътибор берилса, саломатликдаги муаммоларни бартараф қилса бўлади. Аммо бунинг учун бефарқ бўлмаслик ва ўз вақтида шифокорга мурожаат қилиш керак. Яхши мутахассис ташхисдан келиб чиқиб индивидуал даво чоралари ва ижобий натижага эришиш учун стратегия тузиб беради.
Изоҳ (0)