Энг жиддий касалликлардан бири ҳисобланган ичак саратони сўнгги вақтларда нафақат катталар, балки ёшларда ҳам кузатилади. Келтирилган тавсиялар эса унинг олдини олишга ҳисса қўшади.
Кўпроқ ҳаракат қилинг
Ичакларда саратон ривожланишини келтириб чиқарувчи асосий омил кўп ўтириш ва ҳаракатсизлик ҳисобланади. Кун давомида қанча кўп ўтирилса, организмдаги яллиғланиш жараёни шунча тезлашиб, касаллик ривожланиш хавфи юқори бўлади. Ишингиз давомида узоқ вақт давомида ўтириб ишлашга тўғри келса, ҳар соат ўрнингиздан туриб юриш ҳамда машқ қилишга ҳаракат қилинг. Ишдан кейин бироз пиёда юриб сайр қилсангиз яна яхши.
Қуёш нуридан кўпроқ баҳраманд бўлинг
13 минг иштирокчи қатнашган тадқиқотда, ичаклар саратони D витамининг етишмаслиги билан алоқадор экани аниқланган. Айнан шу сабаб ҳам қуёшдан ҳимояловчи кремларни суртиб, кўчада ҳеч бўлмаганда 30 дақиқа юришга ҳаракат қилиш керак.
Кўпроқ клетчатка истеъмол қилинг
Клетчаткага бой ёрма, барра мева ва сабзавотлар, шунингдек, дуккакли маҳсулотлар рационингиздан ўрин олишига эътибор қаратинг. Клетчатка нафақат ичаклар фаолиятини яхшилайди, балки колоректал саратон ривожланишининг олдини ҳам олади.
Чекишни ташланг
Чекиш нафақат ўпка, балки ичакларда ҳам саратон ривожланишига сабаб бўлиши мумкин.
Қаҳва ичинг
Мунтазам равишда қаҳва истеъмол қилиш, ичакларда саратон ривожланиши хавфини 26 фоизга камайтиради. 10 минг иштирокчи қатнашган тадқиқотда, кунига 2,5 финжон қаҳва ичган кишиларда саратон билан касалланиш эҳтимоли кам бўлиши аниқланган.
Вазнингизни назорат қилинг
Вазннинг ортиши ҳам касалликнинг ривожланишига таъсир қилади. Айнан шу сабаб ҳам семириб кетмасликка ҳаракат қилиш керак.
Спиртли ичимлик истеъмол қилманг
Кун давомида 4 порция спиртли ичимлик ичиш ичакларда саратон ривожланиш хавфини 21 фоизга кўпайтиради. Айнан шу сабаб ҳам алкоголь маҳсулотларини истеъмол қилмаслик керак.
Изоҳ (0)