Жиғилдон қайнаши ошқозон ширасининг жуда кўп ишлаб чиқарилиши билан боғлиқ бўлиб, кислота тўғридан-тўғри қизилўнгачга кириб, шиллиқ қаватни безовта қилади. Албатта, муаммонинг келиб чиқиши ҳақида шифокор (терапевт ёки гастроэнтеролог) билан маслаҳатлашган маъқул, лекин ҳеч қандай дори-дармонларсиз ҳам уйда бу муаммони ҳал қилиш мумкин.
Жиғилдон қайнаши қандай пайдо бўлади?
Жиғилдон қайнашига олиб келувчи асосий омиллардан бири бу нотўғри овқатланишдир. Кўп овқат еб қўйиш, тез овқатланиш, ёмон чайнаш, йўл-йўлакай овқат ейиш шулар жумласидан. Ширин, аччиқ, қовурилган, шўр, ёғли таомлар ва спиртли ичимлик истеъмол қилиш ҳам жиғилдон қайнашига олиб келади. Шунингдек, шоколадли кофе, сархил ва нордон мевалар, кондитер маҳсулотлари ошқозонда кислоталикни оширадиган овқатлар гуруҳига киради.
Бундан ташқари, дори-дармонларни қабул қилиш ҳам ошқозонда ноқулайлик туғдириши мумкин.
Халқона воситалар ва рецептлар- Сув. Ошқозон шиллиқ қаватига фойдали таъсир кўрсатади. Бунинг учун кам миқдорда илиқ сув ичиш лозим.
- Ичимлик содаси. Тахминан, 1 чой қошиқ содани 300 мл илиқ сувда эритиб ичинг. У кислотани зарарсизлантиради, аммо таъсири узоқ вақт давом этмайди — оғиқ бўлган ҳолатларда ёрдам бермаслиги мумкин.
- Фаоллашган углерод. Ҳомиладор аёлларга ҳам мумкин бўлган восита. Кўмир ортиқча кислотани ютади ва уни чиқариб ташлайди. Енгил ҳолларда 3-4 таблетка етарли, аммо яхши таъсир қилиши учун 10 тагача ичиш мумкин. Таблеткани сув билан ёки сувда эритиб ичиш лозим.
- Олма сиркаси. Уни, албатта, сувда эритиб (ярим стаканга 1 чой қошиқ), овқатланишдан олдин ичиш керак. Жиғилдон қайнашининг енгил шаклларида сирка яхши самара беради.
- Гуруч қайнатмаси (хўрда). У жиғилдон қайнашини секинлик билан енгиллаштиради. Бульонни ичишдан олдин бир неча соат давомида илиқ жойда туриши керак — шунда янада фойдалироқ бўлади.
- Тухум пўчоғи. Пўстлоқни майдалаб, кукун ҳолига келтириш лозим ва кунига уч марта, 0,5 чой қошиқдан истеъмол қилинади.
- Селдерей илдизини майдалаб, устидан қайноқ сув қуйинг. Овқатдан кейин 1 ош қошиқдан ичинг.
- Мойчечак. 3 ош қошиқ қуритилган гулларга бир стакан қайноқ сув қуйинг ва 20 дақиқага тиндиринг. Овқатдан олдин кунига 3 марта ичинг. Таъсир дарҳол сезилмаслиги мумкин, аммо 2 ҳафтадан сўнг ҳолат сезиларли даражада яхшиланади. Шунингдек, мойчечакли дамламани профилактика мақсадида ичиш ҳам тавсия этилади.
- Алоэ баргларидан 1 чой қошиқ шарбатини сиқиб олинг ва 300 мл сув билан суюлтиринг. Шарбатнинг озгинасини сариёғ билан аралаштириб, истеъмол қилиш фойда беради.
Қуйидаги маҳсулотлар ҳам биринчи навбатда рационга киритилиши керак:
- бодом;
- банан;
- қовоқ ва кунгабоқар уруғлари;
- асал;
- сут;
- оқ карам шарбати;
- картошка шарбати.
Агар юқоридаги тавсиялардан сўнг ҳам жиғилдон қайнаши тўхтамаса, бундай ҳолларда шифокор маслаҳати жуда муҳимдир.
Мавзуга доир:
Изоҳ (0)